Inyalat ni Delfin P. Dumayas, iti Brgy. 7 San Miguel, San Nicolas, Ilocos Norte, ti Umuna a Gunggona iti Pasalip ALVIYA iti Sarita 2026 babaen ti saritana a “Kantibas.”
Maysa a premiado a mannurat ni Dumayas ken scriprtwriter ti Luvlet Artist and Talent Center Drama Productions iti babaen ti Bombo Radyo Philippines. Aktibo a miembro ti The Church of Jesus Christ of Latter-Day Saints a nagserbianna a kas misionero sadiay Cagayan de Oro.
Inyalat met ni Efren Inocencio, maysa a retirado a mannursuro (Master Teacher II) ti Siudad ti Batac, ti Maika-2 a Gunggona babaen ti saritana a “Maestro Demencio Cavao.”
Adun ti naipablaak a sinuratna iti Bannawag, Liwayway, ken Modern Teacher. Addan naipablaakna a libro, ti “Kulukol Iti Kilikili” nga impablaak ti Saniata Publications.
Maysa a residente ti Baguio City, ni Jaime Agpalo, Jr, ti nangabak iti Maika-3 a Gunggona babaen ti saritana a “Nangato a Bantay.”
Mannurat ti Bannawag, mabalangatan a Talaang Ginto: Makata ng Taon 2026
Dati nga scriptwriter iti radio (1992-1997) sakbay nga immalis iti pagiwarnak iti Ilocos Sur, ti Saringit Chronicle, (1997-2001) a nagbalin a Tawid Magazine, nga idi agangay, nagbalin a pagiwarnak a Tawid News Magazine. Agsursurat kadagiti daniw, sarita, salaysay, ababa a drama, komentario, panirigan, editorial, damdamag ken Bukanegan. Maysa a premiado a mannurat-mannaniw, nakaurnongen iti 24 a gunggona a pakairaman ti Palanca Awards.
Awaten met ni Oswald Valente, Punong Barangay ti Comcomloong, Currimao, Ilocos Norte, ti maysa kadagiti dua a Pangliwliwa a Gunggona para iti saritana a “Panagsubli.”
Maysa a mannalon, lider dagiti organisasion sibiko ken dadaulo iti simbaan a nakaikappenganna. Nangab-abaken kadagiti pasalip iti panagsurat a pakairamanan ti Palanca Awards. Addan anakda, ni Hannah Abigail, ken dati nga Evangeline Puyaoan Quibin ti Batac City nga asawana.
Ni Mighty Rasing ti mangawat iti maysa pay a Pangliwliwa a Gunggona babaen ti saritana a “No Agbiagka nga Awan Patinggana.”
Naipasngay ken dimmakkel iti probinsia ti Isabela ngem agdama nga agnaed idiay New Braunfels, Texas, kaduana ti asawana, ni Charina Rasing, ken dagiti tallo nga annakda. Agserserbi a kas empleado ti Discipleship Ministries, maysa a general agency ti United Methodist Church. Premiado met laeng a mannurat ni Mighty.
Mayawatto dagiti gunggona iti GUMIL Filipinas Dap-ayan 2026 inton Abril 18-19, 2026 Iti MMDA Main Office, Siudad ti Pasig City.
Nagpaay a hurado ita a tawen da Cles B. Rambaud, retirado nga editor ti Bannawag; Ariel Sotelo Tabag, dati a literary editor ti Bannawag ken Juan Al. Asuncion, agdama nga editor ti Bannawag.
Ti Pasalip ALVIYA iti Sarita ket imanmanehar ni Dr. Freddie Padua Masuli ti Cagayan State University ken is-isponsoran ni Alex Vicente Yadao ti New York City. (FPM)
