Padayawan ti Komisyon sa Wikang Filipino (KWF) ni Eugene Geibrielle A. Nacino, 19, ti Bangui, Ilocos Norte, mannurat ti Bannawag, a kas Makata ng Taon 2026 ti Talaang Ginto, gapu iti panangabakna iti Umuna a Gunggona babaen ti daniwna a Tagalog nga “Asín sa Hasang ng Lupà.”
Maipaayan ni Nacino iti tropeo, medalia, ken premio a ₱30,000. Awatenna daytoy bayat ti KWF Araw ng Parangal 2026 a maangay inton Abril 29, 2026 iti Siudad ti Quezon.
Agbasbasa ni Nacino iti Saint Louis University, Siudad ti Baguio, first year-na iti kurso a Bachelor of Science in Medical Laboratory Science.
Nagpaay nga editor-in-chief ti “Ang Banaag,” opisial a pagiwarnak ti Bangui National High School. Adun ti naipablaakna a daniw iti Bannawag Magazine ken nangabaken iti nadumaduma a salip iti panagsurat iti daniw kas iti Mga Tala at Tula, Maestra Mercedes Pundador Awards, kdp. Maysa pay kadagiti shortlisted a mannurat a pakapilian ti Grand Winner 2026 iti Pambansang Timpalak sa Personal na Sanaysay ti Gawad Rene O. Villanueva.
Kadua ni Nacino a nangabak da Joseph E. Cemena, Maika-2 a Gunggona, babaen ti daniwna a “Lubid ng mga Tinig” (maipaayan iti plake ken ₱20,000); Romeo P. Peña, Maika-3 a Gunggona, “Mina Extraer” (plake ken ₱15,000).
Dumayas, umuna iti Pasalip ALVIYA iti Sarita 2026
Karangalang Banggit met da Emersan D. Baldemor, “Panagdait Field Theory”; ken Mark Anthony S. Angeles, “Mga Ártepákto ng Naritó at Ngayón.”
Maysa a salip iti panagsurat iti daniw a Tagalog (Filipino) ti Talaang Ginto: Makata ng Taon a tinawen nga isaysayangkat ti KWF ken addaan panggep a mangparegget ken mangidur-as iti panagdaniw a Tagalog wenno Filipino babaen ti panangbigbig kadagiti beterano ken agdadamo a sirib ken timek ti arte ti daniw.(rva)
