Impalagip ni Chief Justice (CJ) Alexander G. Gesmundo kadagiti hues ti trial court a mabalinda nga usaren ti teknolohia a kas iti Artificial Intelligence (AI) a tumulong kadakuada ngem saan a mangsandi iti bukodda a pangngeddeng.
Kinuna ni Gesmundo a saan a magun-od ti hustisia babaen ti mekanikal a panangyaplikar kadagiti linteg, ngem babaen ketdi ti nainsiriban nga interpretasion a mangbigbig iti pateg ti maysa a tao nga isu ti nakairantaan ti linteg.
Nagpaay a guest speaker ni Gesmundo iti Philippine Judges Association (PJA) a naangay iti Siudad ti Iloilo itay Oktubre 24.
Kinuna ni Gesmundo nga iti amin a teknolohia, ti AI -- gapu ta kabaelanna ti aganalisar a sipapardas kadagiti ginabsuon a datos, mangipadto iti resulta, ken mamagbalin nga automatiko kadagiti mekanikal ken maulit-ulit nga aramid -- ti mangbalbaliw no kasano a maipaay ti legal a serbisio ken no kasano ti operasion ti sistema ti hustisia.
Australiano, 2 pay, natiliw gapu iti bogus a doliar
Kinuna ni Gesmundo a babaen ti Strategic Plan for Judicial Innovations (SPJI), arakupenda ti AI a kas paset ti sistemada.
innayon ni Gesmundo nga agpuonan ti Korte Suprema kadagiti ramit a patarayen ti AI tapno maan-annayas ti panagtrabaho ti korte, nangruna iti voice to text transcription ken mainaig-kadagiti-linteg a sukisok. (Rey G. Panaligan/Manila Bulletin//Lito Hilidon/Bannawag)
