Naideklarar idi rabii ti Oktubre 24 (Huebes) ti State of Calamity iti probinsia ti Cavite gapu iti Bagyo Kristine, segun ken ni Gobernadora Athena Tolentino.
Kinuna ni Provincial Information Officer ti Cavite Denesse S. Cajulis nga itoy nga aldaw, Okt. 25, addan 2,532 a pamilia wenno 8,913 a katao ti naipan iti pagbakuitan iti entero a probinsia. Ngem mabalin pay nga umadu ta saan pay a nagidatag iti report dagiti dadduma a local government units (LGUs) gapu iti kaawan ti koriente.
Kadagupan ti 23 a siudad ken ili ti Cavite, 11 kadagitoy ti nalayus, ken dua a dam iti Bacoor City ken siam a karayan ti naireport a naglipias kalpasan ti nakaro a panagtudo.
Nairaman kadagiti nalayus a lugar ti Noveleta, ta naglipias ti Ylang-Ylang River.
Australiano, 2 pay, natiliw gapu iti bogus a doliar
Nupay awan ti nairekord a natay, adda ketdi naireport a mapukpukaw a tao iti Tagaytay ngem di pay napatalgedan dagiti autoridad no pudno daytoy a report. (Carla Bauto Deña/Manila Bulletin//Lito Hilidon/Bannawag)
