Mabalin nga agsubli ni Bagyo Kristine (internasional a nagan "Trami") kalpasan a rummuar daytoy iti pagilian gapu iti posible nga interaksionna iti umasideg a dawel ti panawen, a mabalin a mangparnuay iti Fujiwhara effect.
Inlawlawag ni Weather Specialist ti Philippine Atmospheric, Geophysical and Astronomical Services Administration (PAGASA) Benison Estareja itay Oktubre 25, a maparnuay ti Fujiwhara effect no ti dua a bagyo, a tunggal maysa ket addaan iti pigsa ti maysa a bagyo, ket aginnasideg iti agarup 1,400 a kilometro ken apektaranda ti tignay ken kapigsa ti tunggal maysa.
Itay 8:00 ti agsapa ti Biernes, nasaripatpatan ti PAGASA ti tropical depression iti 2,245 a kilometro iti daya ti Eastern Visayas, nga addaan iti pigsa a 55 a kilometro tunggal oras ken pugso a 70 a kilometro tunggal oras. Agpaamianan a laud daytoy iti kapardas a 20 a kilometro tunggal oras.
Kinuna ni Estareja a manamanama a pumigsa pay ti nasao a tropical depression ket mapanaganan iti "Leon" apaman a sumrek iti Philippine Area of Responsibility (PAR) inton Oktubre 27.
Australiano, 2 pay, natiliw gapu iti bogus a doliar
Iti sabali a bangir, ti sentro ti Bagyo Kristine ket addan iti 200 a kilometro iti laud ti Bacnotan, La Union ket nagtalinaed ti pigsana a 95 a kilometro tunggal oras iti asideg ti sentrona ken pugso a 115 a kilometro tunggal oras. Agpalaud-amianan a laud iti kapigsa a 15 a kilometro tunggal oras.
Kinuna ni Estareja a mabalin a maparnuay ti Fujiwhara effect gapu iti yaasideg ni tropical depression Leon ket agtungpal iti panagsubli wenno panagrikusna iti pagilian, a manamnama a rummuaren iti PAR ita nga aldaw.
Innayon ni Estareja a ti panagrikus ni Kristine ket mabalin nga agtungpal iti iseserrekna manen iti PAR ken dagiti epekto daytoy iti laud a taaw ti pagilian. (Ellalyn De Vera-Ruiz/Manila Bulletin//Lito Hilidon/Bannawag)
