Simmangpet ti maysa a cargo plane ti Philippine Air Force (PAF) iti Bicol International Airport (BIA) iti Daraga, Albay itay agsapa ti Biernes (Oktubre 25) a nagluganan dagiti relief goods, tattao, rubber boats, ken dadduma pay nga alikamen a mausar iti rescue operation, iti dua a probinsia iti Bicol a dinadael ni Bagyo Kristine (international a nagan Trami).
Iti maysa nga interbiu, kinuna ni Direktor ti Office of Civil Defense (OCD)-5 (Bicol) Claudio Yucot a dagiti rescue team manipud iti National Disaster Risk Reduction Management Council (NDRRMC) ken dagiti kargamento ket naggapu kada Diputado ti Ako Bicol Party List Representative Elizaldy Co, ken House Speaker Martin Romualdez.
Karaman kadagiti alikamen ti 20 a rubber boat ken 20 nga outboard motor a maiwaras kadagiti disaster response unit ken local government unit (LGU) iti Camarines Sur ken Albay.
Segun ken ni Yucot, tallo a rubber boat ti maipan iti 49th Infantry Batallion; dua iti Philippine National Police Maritime Group; tallo iti Naval Forces Southern Luzon; tallo ti mapan iti Philippine Coast Guard, ken siam kadagiti LGU ti Canaman, Camaligan, Naga City, Milaor, Gainza, Bula, Nabua, ken Bato iti Camarines Sur ken iti ili ti Oas iti Albay.
Australiano, 2 pay, natiliw gapu iti bogus a doliar
Tallo pay nga eroplano ti PAF ti manamnama a sumangpet iti Albay ita nga aldaw a mangyeg iti tulong manipud iti Iloilo, Cagayan de Oro, ken Davao. (Connie Calipay/PNA//Lito Hilidon/Bannawag)
