Impasigurado ti Department of Agriculture (DA) itay Oktubre 25 ti naparpartak a pannakaipaay ti tulong kadagiti mannalon tapno napardas ti ibabangonda kalpasan ti Bagyo Kristine.
Segun ken ni Assistant Secretary ti DA Arnel de Mesa, imbilin ni Sekretario ti DA Francisco Tiu Laurel Jr. kadagiti amin a regional field office, ACPC (Agricultural Credit Policy Council), iti PCIC (Philippine Crop Insurance Industry), ken iti amin a maseknan nga ahensia a papardasenda ti pannakairuar ti tulong kadagiti mannalon ken mangngalap nga inapektaran ni Kristine tapno manginanamada iti agtultuloy a suportar ti gobierno.
Kinuna ni De Mesa a kadagiti naapektaran a lugar, nangteden ti DA iti PhP80.21 a milion a balor ti ramit ti panagmula, agraman bin-i ti pagay, mais, high-value crops, agas, ken biologics; PhP500 a milion a mautang a pondo babaen ti Survival and Recovery Loan ti ACPC; PHP500 a milion a quick respond fund; gastos para iti gasolina; ken dadduma pay a mabayadan kadagiti nakaseguro a mannalon iti sidong ti PCIC.
Itay Huebes (Okt. 24), impakaammo ti DA-Disaster Risk Reduction and Management Operations Center nga agdagup iti PhP80.80 a milion ti balor ti nadadael iti agrikultura iti bagas, mais, high-value crops ken taraken.
Australiano, 2 pay, natiliw gapu iti bogus a doliar
Di nababbaba ngem iti 2,864 a mannalon ti naapektaran iti Cordillera Administrative Region, Mimaropa, Bicol, ken Western Visayas. (Stephanie Sevillano/PNA//Lito Hilidon/Bannawag)
