Maipatulod dagiti Presidential helicopter ken dadduma pay a lugan dagiti soldado ken polisia a mangtulong kadagiti inapektaran ti Bagyo Kristine.
Daytoy ti kinuna ni Presidente Ferdinand Marcos Jr. ita nga aldaw, Oktubre 25, iti panangipanamnamana nga umayen ti tulong babaen ti daga, tangatang ken uray iti taaw.
Kinuna ni PBBM nga imbilinna ti naan-anay a pannakaipatulod dagiti kameng ken rekursos ti Armed Forces of the Philippines (AFP) tapno maiwayat ti relief operations. Mairaman ditoy dagiti kameng ti AFP ken Philippine National Police (PNP) medical corps.
Kinuna ni PBBM timmayab ti C-130 manipud iti Manila itay agsapa ket nagdisso iti Bicol International Airport kalpasan ti maysa oras. Adda pay kameng a naglugan iti BlackHawk a helikopter iti Legazpi ket padpadasenda ti mapan iti Naga.
Australiano, 2 pay, natiliw gapu iti bogus a doliar
Binilin pay ni PBBM ti Sekretaria ti DBM (Department of Budget and Management) tapno nadardaras a mairuar dagiti pondo tapno magatang dagiti kaspaulan.
Adda 36 nga ili ti Camarines Sur nga inapektaran ti bagyo, ket 9 nga ili ti malaylayus pay laeng agingga ita. (Betheena Unite/Manila Bulletin//Lito Hilidon/Bannawag)
