Mapan a di nakurkurang a 75 a tao ti nagsakit, maipagarup a gapu iti kinnanda a hamburger manipud iti McDonald’s.
Maipagarup nga addaan iti makapatay a bakteria nga E. coli ti kinnanda a quarter pounder hamburger. Agnaed dagitoy a tattao iti 13 nga estado ti U.S.A., kas kuna dagiti federal health officials idi Biernes, Oktubre 25.
Agdagup iti 22 a tao ti adda ita iti ospital, dua kadagitoy ti naaddaan iti nakaro a komplikasion iti bato, kas kuna ti Centers for Disease Control and Prevention. Maysa met ti natay iti Colorado.
Awan pay ti naitudo a masnop a naggapu iti makapatay nga E. coli, nupay sagudayen ti damo nga impormasion manipud iti U.S. Food and Drug Information a mabalin a naggapu daytoy iti di naluto a nagalip a sibuyas a naaramat a kas ramen dagiti hamburger.
Australiano, 2 pay, natiliw gapu iti bogus a doliar
Kinuna met ti McDonald’s a naggapu dagiti sibuyas iti Taylor Farms a masarakan ti kangrunaan a farm-na iti California.
Mainaig itoy, kuna ti McDonald’s nga isardengda pay laeng ti agala iti sibuyas iti Taylor Farms.
Kuna met ti Taylor Farms nga impaisublidan dagiti sibuyasda nga adda iti pasilidadda iti Colorado Springs, Colorado.
Ditoy ti naggapuan dagiti sibuyas a para iti McDonald’s.
“Maladingitankami iti daytoy a napasamak,” kinuna ti Taylor Farms, a kukua ti maymaysa a pamilia.
Gapu met itoy, insardeng pay laeng ti McDonald’s ti agiserbi iti Quarter Pounder burger iti nadumaduma nga estado, kangrunaanna kadagiti Midwest ken Mountain states, apaman a naammuanda ti kaadda dagiti nagsakit, maipagarup a gapu iti inserbida a hamburger.
Nupay saan pay a masigurado a naggapu ti E. coli kadagiti naisubli a sibuyas, inkeddeng metten dagiti dadduma pay a fast-food restaurants ti saan pay laeng nga agidasar iti makan nga addaan iti sibuyas.
Mairaman kadagitoy a fast-food restaurants ti Taco Bell, Pizza Hut, KFC ken Burger King.
Kuna ti Restaurant Brands International, akinkukua iti Burger King, a 5 a porsiento kadagiti restaurant-na ti agar-aramat kadagiti sibuyas manipud iti pasilidad ti Taylor Farms iti Colorado. (ASSOCIATED PRESS/Manila Bulletin//Cles Rambaud/Bannawag)
