Agsapsapul ti gobierno iti wagas tapno mataming ti nakurang a danum ken gasolina iti Camarines Sur kalpasan ti panangbasnot ni Bagyo Kristine iti probinsia.
Iti naangay a situational briefing iti Malakanyang itay Oktubre 25, kinuna ni Sekretario ni Sekretario ti Department of National Defense (DND) Gilberto Teodoro Jr. a binaonnan ti Office of Civil Defense (OCD) nga agbirok iti ruta nga agturong iti Camarines Sur a mabalin a pangibiahe ti militar kadagiti landing craft tanks (LCTs) a mangiballasiw kadagiti tangke ti gasolina.
Nangrugin ti shuttle service a bumallasiw iti Bondoc Peninsula nga agturong iti ili ti Pasacao iti Camarines Sur tapno mangitulod dagiti kasapulan unay a danum, gasolina, agraman ti taraon para kadagiti biktima ti bagyo.
Tapno mataming ti parikut iti lohistika, inusar ti Philippine Air Force (PAF) ti 205th Helicopter Wing ken ti 505th Search and Rescue Group dagiti rotary assets tapno mapasayaat ti panagtayabda para iti humanitarian assistance and disaster response (HADR) operation. (Martin Sadongdong/Manila Bulletin//Lito Hilidon/Bannawag)
