Kinondenar ti Philippine Army (PA) ti maatap a panangraut ti New People’s Army (NPA) kadagiti soldado a mangtultulong kadagiti biktima ni Bagyo Kristine iti Pio, Duran, Albay itay Oktubre 27.
Segun iti naidanon a report iti Camp Aguinaldo iti Siudad ti Quezon, nasagang dagiti kameng ti 49th Infantry Battalion ti 10 a lallaki bayat nga aginbumbunongda iti taraon, danum, ken dadduma pay a tulong kadagiti naapektaran a pamilia iti Barangay Matanglad iti 6:15 ti agsapa ti Domingo.
Nagpaut ti rinnupak iit 15 a minuto a nakasugatan ti maysa a soldado kalpasan a mapuntaan ti shrapnel manipud iti anti-personnel mine. Saan pay a masinunuo ti PA no adda natay iti biang ti NPA.
Segun iti report, innala dagiti rebelde ti dadduma a relief packs a nairanta a para kadagiti evacuees gapu ta agsagsagabada met iti bisin gapu iti epekto ni Bagyo Kristine.
AFP, ginutigotna ti CPP nga idiandan ti armado a pannakidangadang
Kiniddaw ni panakangiwat ti PA Col. Louie Dema-ala iti publiko nga idanonda koma kadagiti autoridad ti ania man a nga impormasion mainaig kadagiti armado a grupo a mabalin a pagpeggadan ti kinatalged iti gimong.
Nasamsam dagiti soldado iti lugar ti improvised explosive device (IED), bandoleer, selpon, tallo nga indayon ken uppat a back pack a mapapati a kukua dagiti rebelde. (Martin Sadongdong/Manila Bulletin//Lito Hilidon/Bannawag)
