Nupay imbagana a di pay nagun-od ti Filipinas ti "zero hunger," impaganetget ni Presidente Ferdinand R. Marcos Jr. (PBBM) nga awan ti malabsan a Filipino iti panangparmek ti gobierno iti bisin ken kinakurapay.
Daytoy ti kinuna ni Presidente Marcos Jr. iti pannakaiparang ti napirmaan a joint memorandum circular ti Enhanced Partnership Against Hunger and Poverty (EPAHP) iti Malakanyang itay Oktubre 28.
Kinuna ni PBBM nga iti daytoy a tawen, binilinna amin nga ahensia ti gobierno ken dinagadagna dagiti local government units (LGUs) a suportaranda ti pannakaipatungal ti EPAHP tapno mapatibker ti panagregget ti gobierno a manggun-od iti "zero hunger," taraon ken natalged a nutrision, ken sustainable agriculture.
Babaen daytoy patien ni PBBM a mapasayaat dagiti maapit iti talon, mapagnanaig dagiti mannalon, mangngalap, ken dadduma pay a mangpataud iti taraon kadagiti dadakkel a merkado, ken mangipaay iti natalged a matgedan, ket maluktan ti potensial a mangitag-ay iti biag dagiti mannalon.
AFP, ginutigotna ti CPP nga idiandan ti armado a pannakidangadang
Innayon ni PBBM a babaen ti joint memorandum circular, mabukelda ti koalision ti 34 a kaasmang -- manipud iti nailian nga ahensia agingga iti internasional a gunglo -- tunggal maysa, nagkumit a tumulongda iti pannakagun-od ti "zero hunger" iti Filipinas. (Betheena Unite/Manila Bulletin//Lito Hilidon/Bannawag)
