Maysa a babai ti kinemmeg dagiti kameng ti National Bureau of Investigation (NBI) iti Taguig City a mapapati nga aglaklako iti online ken live sex shows dagiti ubbing a pakairamanan dagiti annakna a babbai.
Kinuna ti NBI a kinemmeg dagiti kameng ti Human Trafficking Division (NBI-HTRAD) idi Oktubre 21 ti nasao a babai babaen ti bileg ti Warrant to Search and Examine Computer Data (WSSECD) nga impaulog ti Taguig City Regional Trial Court (RTC) Branch 15.
Nagtungpal ti operasion iti pannakakemmeg ti babai, a di innaganan ti NBI, a naaktuaranda nga agpabpabuya iti seksual nga aramid, ken pannakaispal ti uppat pay a biktima a menor de edad.
Inwayat ti NBI ti operasion maibatay iti impormasion a naawat ti NBI-HTRAD a maysa a maatap a "facilitator" iti Filipinas ti mangipatpatulod kadagiti sexually exploitative a ladawan ken video dagiti ubbing iti Estados Unidos (US).
117 nga empleado ti maysa a lending company iti Makati, nakemmeg
Intuloy ti NBI-HTRAD ti operasionda idi Oktubre 21 kalpasan nga imbaga ti babai iti undercover agent ti NBI a maaramid ti live show iti dayta nga aldaw. (Jeffrey Damicog/Manila Bulletin//Lito Hilidon/Bannawag)
