Nangipaay iti tulong ti Department of Social Welfare and Development (DSWD) iti baro a batch dagiti overseas Filipino workers (OFWs) a napagawid iti pagilian gapu iti riribuk iti Lebanon.
Iti babaen ti “airport salubong” project, siraragsak nga inawat dagiti tattao ti DSWD Field Office (FO)-National Capital Region (NCR) karaman dagiti dadduma pay a nailian nga ahensia ti gobierno dagiti 244 overseas Filipinos (OFs) ken 36 dependents dagitoy. Naglugan dagiti OFWs iti chartered flight manipud iti Lebanon.
Kasano a labanan ti cyberthreat kadagiti pirate site?
Iti babaen ti Assistance to Individuals in Crisis Situations (AICS) ti DSWD, makaawat dagiti 232 overseas Filipino workers (OFWs) ken 12 OF iti PhP10,000 cash a tulong malaksid pay iti nayon a PhP10,000 para iti food aid.
Kasta met a nangisayangkat dagiti DSWD social workers kadagiti interbiu tapno ma-assess ti dadduma pay a kasapuan dagiti napagawid a Filipino. Maipaayan pay dagitoy iti psychosocial support.
Kuna ni DSWD FO-NCR Regional Director Michael Joseph Lorico a babaen daytoy a pamuspusan nga imbilin ni Presidente Ferdinand R. Marcos Jr., itultuloy ti DSWD a monitoren ti situasion dagiti mapagawid iti pannakitinnulong dagiti sabsabali pay nga ahensia ti gobierno. Kunana pay a nakasagana ti nasao a departamento a mangipaay iti nayon a tulong no kasapulan.
Malaksid pay iti tulong nga impaay ti DSWD, nakaawat pay dagiti OFWs iti PhP75,000 manipud iti Department of Migrant Workers (DMW) ken PhP75,000 manipud iti Overseas Workers Welfare Administration (OWWA).
Addan aganay a 1,772 OFWs; 57 OFs ken 176 dependents ti nakaawid iti pagilian manipud iti Lebanon a nangibilinan ni Presidente Marcos Jr. iti tulong kadagiti Filipino a napukawan iti trabaho gapu iti riribuk iti nasao a pagilian. (AST/Bannawag)
