Imbilin ti National Disaster Risk Reduction and Management Council (NDRRMC) kadagiti local government units (LGUs) nga ipatungpalda ti inkapilitan a panagbakuit kadagiti lugar a maibilang a napeggad unay (wenno “high-risk”) gapu iti posible a didigra a yeg ni Bagyo "Leon."
Impaulog ni daulo ti NDRRMC Sekretario ti Department of National Defense (DND) Gilberto Teodoro Jr. daytoy a bilin itay rabii ti Lunes, Oktubre 28, a tinungpal ti Department of the Interior and Local Government (DILG) babaen ti maysa a memorandum order.
Pinirmaan ni Officer-in-Charge Undersecretary ti DILG Lord A. Villanueva ti nasao a memorandum order a nangbilin kadagiti LGU nga agtungpal iti direktiba ni Teodoro ket impaganetgetda a masapul a maipatungpal a dagus daytoy.
Nagbalinen a bagyo ni Leon bayat ti panangtuparna iti taaw iti daya ti Cagayan, segun iti Philippine Atmospheric, Geophysical and Astronomical Services Administration (PAGASA).
Australiano, 2 pay, natiliw gapu iti bogus a doliar
Naibilin kadagiti local chief executives (LCEs) nga ipakatda ti inkapilitan a panagbakuit no kasapulan, kas maitunos iti Republic Act 10121 wenno ti Disaster Risk Reduction and Management Act ken ti Local Government Code tapno nadaras a mayallatiw dagiti agindeg kadagiti napeggad a lugar kadagiti naituding nga evacuation center wenno natalged a lugar. (Martin Sadongdong/Manila Bulletin//Lito Hilidon/Bannawag)
