TABUK CITY, Kalinga – Maysa a lalaki nga agtawen iti 30 nga aggatgatang iti balitok ti natay a napaltogan iti Barangay Bulanao itoy a siudad idi bigat-kalman, Oktubre 29.
Innaganan ni Police Master Sgt. Prodencio Atas, spokesperson ti Tabuk City police station, ti biktima a kas John Cabigat.
Maibatay iti panagpalutpot ti polisia, dua a di am-ammo a lallaki ti napan iti kuarto nga up-upaan ti biktima ken ti kabsatna a lalaki a ni Jonathan.
Maysa kadagiti maatap ti naka-face mask, nakaaruat iti nangisit a T-shirt, ken pantalon, ti nagpaay a guardia iti ridaw ti kuarto idinto a ti kaduana a nagaramat iti tactical pants ti nanguray iti biktima a rummuar iti banio. Apaman a nakaruar ti biktima iti banio, pinaltogan a dagus ti naka-tactical pants.
Ilocos Sur, Umuna a Puesto iti Regional SubayBAYANI Awards
Nagtaray dagiti suspek a nangkamang iti maysa nga overpass idinto nga intaray met ni Jonathan ti kabsatna iti ospital. Ngem saanen a nakalasat ti biktima.
Nakasarak ti polisia iti kapsula iti nakapasamakan ti krimen. Iwaywayat ita ti polisia ti naan-anay nga imbestigasion mainaig iti krimen. (Freddie Lazaro/ Manila Bulletin)
