Nasurok a 27,000 a kameng ti Philippine National Police (PNP) ti maiwaras iti entero a pagilian tapno makarikna iti kinatalged dagiti umili iti adu a makitada a polis a mangipaay kadakuada iti kasapulan a tulong bayat ti Piesta Dagiti Natay ("All Saints' Day" ken "All Souls' Day"), kinuna ni Sekretario ti Department of the Interior and Local Government (DILG) Juanito Victor "Jonvic" Remulla ita, Oktubre 30.
Impasigurado ni Remulla a mangipaay ti Bureau of Fire Protection (BFP) ken ti Bureau of Jail Management and Penology (BJMP) iti kasapulan a tulong ken suporta iti PNP a mangtaming kadagiti pakaseknan ti publiko iti kinatalged ken agresponde no adda emerhensia.
Dinagadag ni Remulla dagiti amin a local government units (LGUs) nga ukkonenda dagiti bukodda a Local Peace and Order Council (LPOC) ken agsaganada a naimbag tapno masierto ti kinatalged dagiti mapan kadagiti kamposanto ken simbaan.
Kiniddaw pay ni Remulla iti publiko a surotenda koma dagiti pagannurotan kadagiti kamposanto a mangiparit iti panaginum iti arak, panagsugal, ken panangirugi iti ania man a kita ti riribuk. (Chito Chavez/Manila Bulletin//Lito Hilidon/Bannawag)
