Naibayog ti Tropical Cyclone Wind Signal (TCWS) No. 3 kadagiti lugar iti Northern Luzon bayat a pumipigsa ni Bagyo Leon (internasional a nagan "Kong-rey"), segun iti Philippine Atmospheric, Geophysical and Astronomical Services Administration (PAGASA) itay agsapa, Oktubre 30.
Itay alas-4:00 iti parbangon, nasaripatpatan ti sentro ni Bagyo Leon iti 395 a kilometro iti daya ti Calayan, Cagayan ket agpaamianan a laud iti kapardas a 15 kilometro tunggal oras.
Addaan ni Leon iti kapigsa a 165 a kilometro tunggal oras iti asideg ti sentrona, ken pugso nga agingga iti 205 a kilometro tunggal oras.
Naibayog iti TCWS No. 3 iti Batanes ken daya a paset ti Babuyan Islands.
Australiano, 2 pay, natiliw gapu iti bogus a doliar
Agtalinaed iti TCWS No. 2 dagiti dadduma a paset ti Babuyan Island, Cagayan, amianan ken daya a paset ti Isabela, Apayao, Kalinga, amianan ken daya a paset ti Abra, daya a paset ti Mountain Province, ken Ilocos Norte.
Naipan iti TCWS No. 1 ti dadduma a paset ti Isabela, Quirino, Nueva Vizcaya, dadduma a paset ti Mountain Province, Ilocos Sur, La Union, Pangasinan, Nueva Ecija, Aurora, amianan a daya a paset ti Tarlac, amianan a paset ti Bulacan, amianan a paset ti Quezon, Camarines Norte, amianan a paset ti Camarines Sur, ken ti amianan ken daya a paset ti Catanduanes.
Kinuna ti PAGASA a mabalin nga agbalin a super typhoon ni Leon no magtengna ti kapigsa ti angin a 185 a kilometro tunggal oras. (Ellalyn De Vera-Ruiz/Manila Bulletin//Lito Hilidon/Bannawag)
