Dinayaw dagiti Senador ti Korte Suprema (SC) itay Oktubre 29 gapu iti impaulogna a Temporary Restraining Order (TRO) a manglapped iti pannakayakar ti PhP89.9 a bilion nga excess fund ti Philippine Health Insurance Corp. (PhilHealth) iti National Treasury.
Nagyaman ni daulo ti Senate Committee on Health and Demography Senador Christopher “Bong” Go iti SC iti pannakaisardeng pay laeng ti pannakayakar ti pondo ti PhilHealth iti National Treasury tapno maponduan dagiti proyekto a di mainaig iti salun-at dagiti umili.
Kinuna ni Go nga ilungalongna latta ti pannakapasayaat ti serbisio ti PhilHealth ken tapno maipaay ti libre nga agas, serbisio para iti dental ken visual care, assistive devices ken dadduma pay a medikal a kasapulan dagiti marigrigat.
Segun ken ni Senador Joseph Victor “JV” Ejercito, masapul a mausar ti pondo ti PhilHealth kadagiti miembro ti PhilHealth met laeng, a pakairamanan ti amin a Filipino.
Australiano, 2 pay, natiliw gapu iti bogus a doliar
Kinuna met ni Senate Minority Leader Aquilino “Koko” Pimentel III a maysa kadagiti nangidatag iti petision iti SC, a masapul a malapdan ti pannakayakar ti pondo ti PhilHealth ta dayta a pondo ket kontribusion manipud kadagiti miembro. (Hannah L. Torregoza/Manila Bulletin//Lito Hilidon//Bannawag)
