Mapanen a Php11.2-bilion ti pategna nga apit ken rangtay, kalsada ken dadduma pay nga impraestruktura ti naireport a nadadael iti panangbasnot da Bagyo Kristine ken Bagyo Leon iti Kabikolan ken dadduma pay a paset ti Luzon agraman ti Visayas ken Mindanao.
Ipakita ti ladawan no kasano ti namsaakan ti layus nga imbunga ni Bagyo Kristine iti Naga City, Camarines Sur. Naala ti ladawan iti aerial survey nga inwayat ti Armed Forces of the Philippines (AFP) idi Okt. 28, 2024. (Photo: AFP)
Kuna ti National Disaster Risk Reduction and Management Council (NDRRMC) idi kalman, Oktubre 31, 2024, Biernes, a mapan met a 7.9-milion nga umili ti naapektaran kadagitoy dua a bagyo nga itoy a dagup, mapan a 743,000 a tattao ti naipan kadagiti ag-1,980 nga evacuation center.
Kuna ti NDRRMC a mapan nga P6.8-bilion ti pategna nga impraestruktura ti nadadael idinto a mapan met nga P4.4-bilion iti benneg ti agrikultura.
Kiddaw ni Quiboloy a Medical Furlough, inanamongan ti Pasig RTC
Kadakkelan iti pukaw ti Bicol Region (Region 5) iti pateg ti nadadael nga impraestruktura a mapan a P5-bilion. Sumaruno ti Central Luzon (Region 3), P1-bilion; Cagayan Valley (Region 2), P256-milion; Calabarzon (Region 4A), P230-milion; Central Visayas (Region 7), P226-milion; Ilocos Region (Region 1), P150-milion; Cordillera Administrative Region (CAR), P101-milion; Soccsksargen (Region 12), P15-milion; ken Mimaropa (Region 4B), P12-milion.
Ti met laeng Bicol Region ti kadakkelan iti pukaw iti agrikultura, P2.8-bilion. Sumaruno ti Mimaropa, P736-milion; Central Luzon, P316-milion; Ilocos Region, P217-milion; Eastern Visayas, P183-milion; Calabarzon (Region 4A), P75-milion; Western Visayas (Region 6), P39-milion; CAR, P18-milion; ken Soccsksargen, P16-milion. (MARTIN SADONGDONG/Manila Bulletin/ Cles Rambaud/Bannawag)
