Impaganetget ni Department of Education (DepEd) Secretary Sonny Angara ti pannakaiwayat dagiti komprehensibo a sistema ti suporta kadagiti pagadalan tapno mapasayaat ti panagadal dagiti estudiante. Mainaig iti daytoy, indagadagna ti panagtinnulong ti gobierno ken ti pribado a sektor tapno maipaayan dagiti estudiante kadagiti rekursos, ramit, ken gundaway a nasken para iti panagballigida a kas estudiante.
Kinuna ni Angara a nasken ti pannakapapigsa ti suporta iti edukasion tapno mapasayaat ti performance dagiti estudiante bayat ti ibibisita nga indauluan ti DepEd, ti Second Congressional Commission on Education (EdCom2), ken ti UNICEF iti Gapan City, Nueva Ecija.
“Nalawag a dagiti pagadalan ken dagiti estudiante a nangato ti performance-da ket dagitay suportado saan laeng nga iti uneg dagiti pagadalan no di pay ket iti pagtaengan, babaen ti komunidad, ken dagiti lokal a gobierno,” kinuna ni Angara.
Binigbig ti DepEd, EdCom2, ken UNICEF ti Schools Division Office (SDO) ti Siudad ti Gapan gapu iti pagwadan a panangtarawidwidna kadagiti rekursos dagiti pagadalan ken iti naisangsangayan a nagapuanan dagiti estudiante, a nangipasdek iti daytoy a kas modelo para iti public school financing iti entero a Filipinas.
Kiddaw ni Quiboloy a Medical Furlough, inanamongan ti Pasig RTC
“Isaknapyo no kasano nga inaramidyo daytoy,” imparegta ni Angara, a kas panangipaganetgetna iti potensial a pannakaiwayat daytoy kadagiti dadduma a lugar.
Indagadag ni Angara kadagiti staff ti SDO Gapan nga ibinglayda dagiti kasayaatan nga aramidda (best practices) kadagiti dadduma a dibision, a nangitampok iti kinalaingda iti panangtarawidwidda iti limitado a Maintenance and Other Operating Expenses (MOOE).
Binigbig ti UNICEF ti Gapan East Elementary School ken Kapalangan National High School a kas Top Performing Schools, a mangipakita no kasano a makaipaay iti naisangsangayan a resulta ti epektibo a panagusar ti MOOE ken Special Education Fund (SEF).
Kabayatan ti field visit, imbinglay da Angara ken EdCom2 Co-Chair Senator Sherwin Gatchalian dagiti pammaliiwda kadagiti estratehia ti Gapan.
Kadagitoy nga eskuela, kunada a nakatulong ti dakkel a suporta manipud kadagiti nagannak ken local government units (LGUs) iti pananggun-od dagiti estudiante iti 95 a porsiento nga iskor iti Comprehensive Rapid Literacy Assessment (CRLA) ken nangatngato ngem iti average results iti National Achievement Tests (NAT6 ken NAT10).
Inlawlawag ni EdCom2 Director Karol Mark Yee a panggep ti field visit nga adalen no kasano a naiwayat dagiti pinansial nga estratehia tapno agbunga iti napintas a nagapuanan dagiti pagadalan, a mabalin nga agserbi a modelo para kadagiti dadduma pay nga institusion.
Gapu itoy a nagapuanan dagitoy a pagadalan, inyebkas da UNICEF Deputy Representative Behzad Noubary ken Gapan City Mayor Joy Pascual a mangnamnamada nga agbalinda a pagwadan iti umno a pannakaaramat ti pondo idinto a maitandudo met ti nangato a kalidad ti edukasion. (Merlina Hernando-Malipot/Manila Bulletin)
