Impaulog ni Presidente Marcos ti Proklamasion Blng. 724 a nangideklarar iti bulan ti Disiembre ti tunggal tawen a kas Philippine Architecture Festival - National Architecture Month kas pangbigbig iti Filipinas a kangrunaan a makipaspaset kadagiti aramid iti arkitektura iti sangalubongan.
Iti Proklamasionna, a pinirmaan ni Executive Secretary Lucas Bersamin idi Okt. 28, kinuna ti Presidente a ti panangikalawa iti Architecture Week a naiproklamar idi 1971 agingga iti makabulan a selebrasion ket mangawis iti atension iti kontribusion dagiti arkitekto nga agturong iti naplano a panagdur-as ti siudad, panagplano iti aglawlaw, ken iti irarang-ay ti pagilian.
"Kasapulan a... [mapalawa] ti pannakarambak ti Lawas ti Arkitektura tapno mangipaay iti nasaknap a plataporma a mangitandudo iti disiplina, panangbigbig kadagiti kontribusion dagiti arkitekto a Filipino, ken maitampok ti akem ti arkitektura iti pannakaplano dagiti siudad ken dadakkel nga ili, panagaramid kadagiti proyekto iti agrikultura a di makadadael iti aglawlaw, ken irarang-ay ti pagilian,” insuratna.
Innayon ni Marcos no kasano a ti Filipinas, a nalatak gapu iti tawidna iti arkitektura ken nabiag a kontemporaneo a disenio, ket maysa a kangrunaan a makipaspaset kadagiti proyekto iti arkitektura iti sangalubongan babaen ti pannakasaluad ti tawid ti kultura ken iti pannakapaitandudo dagiti aramid a di makadadael iti aglawlaw.
Kiddaw ni Quiboloy a Medical Furlough, inanamongan ti Pasig RTC
Mainaig iti daytoy, pinusgan ti Presidente ti Professional Regulation Commission (PRC) agraman kadagiti akreditado nga organisasion iti arkitektura a mangidaulo iti tinawen a pannakarambak ti Philippine Architecture Festival - National Architecture Month.
Maidagadagag met kadagiti amin a dadduma pay nga opisina ti gobierno agraman dagiti unibersidad ken kolehio ti estado, lokal a yunit ti gobierno, dagiti non-government units (NGO), ken ti pribado a sektor, nga aktibo a makipaset ken mangsuportar iti nadakamat a selebrasion. (Argyll Cyrus Geducos/Manila Bulleting// Cles B. Rambaud/Bannawag)
