Dakkel ti posibilidadna a lumaka ti gasolina ken diesel iti umay a lawas, kas ipakita ti gunay ti industria ti lana.
Maibatay iti kaudian a datos ti presio ti lana, mapattapatta a bumaba ti presio ti gasolina iti P0.40 agingga iti P0.70 kada litro. Mabalin met nga agtalinaed ti agdama a presio ti diesel nupay mabalin met a bumaba agingga iti P0.20 kada litro.
Nupay kasta, mapattapatta a ngumia ti kerosene iti P0.10 agingga iti P0.20 kada litro.
Inlawlawag ni Leo Bellas, presidente ti Jetti Petroleum, a maigapu iti ilalag-an ti tension iti Middle East daytoy a panaggaraw ti presio ti lana. Nupay kasta, innayonna a gapu iti di maipadles a mapaspasamak iti sangalubongan, kas kadagiti pangta ti gubat wenno riribuk, agtultuloy met a di maipadto ti presio ti lana a mangibunga iti panagbaliwbaliw ti presio dagiti produkto ti lana a kas iti gasolina ken diesel.
Kiddaw ni Quiboloy a Medical Furlough, inanamongan ti Pasig RTC
Segun iti FocusEconomics, makissayan ti suplay ti krudo gapu iti tension iti rehion ti Eastern Europe ken Middle East nangruna ita ta agtultuloy ti panagsupsupiat ti Israel ken Iran ken mabalin pay a kumaro.
Malaksid kadagiti oil analysts a mangpalpaliiw iti sangalubongan a panagsusupiat agingga iti maudi a kuarter daytoy a tawen, kitkitaen met dagiti negosiante dagiti sumaruno a miting ti OPEC+ ta ditoy a pagsasaritaan no kasano ti kaadu ti krudo ti pataudenda, kasta met dagiti mapaspasamak iti ekonomia ti Tsina ken Estados Unidos a manamnama a mangapektar iti presio ti lana.
Maipakaammo ti maudi a panagbalbaliw ti presio inton Lunes, Nob. 4, 2024. (Gabriell Christel Galang/Manila Bulletin// Cles B. Rambaud/Bannawag)
