Binigbig ti gobierno ti Filipinas dagiti kameng-a-pagilian ti Association of Southeast Asian Nations (ASEAN) gapu iti panangipaayda iti humanitarian assistance kalpasan ti panangdidigra ti Severe Tropical Storm “Kristine” ken Super Typhoon “Leon" iti Filipinas.
Pinadayawan ti Philippine Air Force ti Singapore, Brunei, ken Malaysia gapu iti impaayda a tulong bayat ti humanitarian assistance and disaster relief (HADR) operations ti PAF kadagiti biktima ti bagyo iti Bicol Region (Region 5) ken dadduma pay a lugar a dinidigra ti layus ken panagreggaay ti daga.
Nangibaon dagiti tallo a pagilian kadagiti military aircraft ken highly-skilled response teams tapno mapapigsa ti airlift capabilities ti Filipinas ken mangibiahe iti relief aid kadagiti naiputputong a lugar gapu iti layus ken panagreggaay ti daga.
Pinadayawan ni Lt. Gen. Stephen Parreño, PAF commanding general, dagiti military response teams manipud kadagitoy tallo a pagilian iti seremonia a naangay iti PAF multi-purpose gymnasium, Villamor Air Base, Pasay City idi Oktubre 31.
Kiddaw ni Quiboloy a Medical Furlough, inanamongan ti Pasig RTC
Timmabuno iti seremonia dagiti contingents manipud iti Republic of Singapore Air Force (RSAF) nga indauluan ni Maj. Goh Meng Hui, Royal Malaysian Air Force (RMAF) nga indauluan ni Maj. Thaddeus Raphael Ak Azis, ken Royal Brunei Air Force (RBAirF) nga indauluan ni Lt. Col. Muhammad Azmi Bin Haji Aflon, agraman dagiti piloto ken tripulanteda.
Binigbig ti Filipinas, babaen ti Philippine Air Force (PAF) nga idauluan ni PAF chief Lt. Gen. Stephen Parreño (sango, maikalima manipud iti kanawan), dagiti military response teams manipud iti Singapore, Brunei, ken Malaysia iti seremonia iti PAF Gymnasium, Villamor Air Base iti Pasay Siudad idi Okt. 31, 2024. (Ladawan: PAF)
“Mapalagip kaniak ti espiritu ti Bayanihan, maysa a maipatpateg a tradision dagiti Filipino a nairamut iti panagkaykaysa ti komunidad, panagtitinnulong ken panagsisinnaranay a mangibaklay iti responsibilidad a mangtulong iti maysa ken maysa kadagiti karit ti biag,” kinuna ni Parreño itoy nga aldaw, Domingo, Nobiembre 3.
Inyunay-unay ni Parreño a ti pannakipaset kadagiti operasion ti HADR dagiti nadakamat a contigent "ket nangipakita iti dedikasion kadagiti natawan a prinsipio ken nangipakita ti kinapateg ti multinasional a panagtitinnulong iti panangisigurado iti naimpanawenan a tulong bayat dagiti didigra.”
Kabayatanna, indauluan ni Sek. Gilberto Teodoro Jr. ti Department of National Defense (DND), ti pormal a send-off ceremony para iti Malaysian team iti Villamor Air Base idi Sabado, Nobiembre 2, kalpasan a nakompletoda ti misionda.
Nairaman iti mission ti Malaysian team, a naisayangkat manipud iti Okt. 26 agingga iti Nobiembre 2, ti pannakaipakat ti Eurocopter EC725 Caracal long-range transport helicopter nga immatonan ti 16-kameng a tripulante a timmulong kadagiti nadidigra.
“Kayatko nga idanon ti naimpusuan a panagyamanko iti gobierno ti Malaysia gapu iti napartak a panangsungbatda iti kiddawmi a tulong. Ti suportayo bayat daytoy kritikal a panawen ket di magatadan bayat ti panangibangonmi manen iti pagilian kalpasan ti nakaro a tropikal a Bagyo a Kristine, ken daytoy nga inaramidyo, ipakitana ti nairut a panagtinnulongtayo iti panawen ti panagkasapulan,” kinunana.
Kinuna ti Office of Civil Defense (OCD) a dagiti kontribusion nga inaramid ti RMAF “ket dakkel ti naitulongna” iti ibabangon manen dagiti biktima ni Kristine iti Bikol.
Maysa a Royal Malaysian Air Force (RMAF) personnel ti nangarakup iti maysa a Filipino counterpart-na bayat ti pormal a send-off ceremony para iti Malaysian team a timmulong iti Philippine Air Force (PAF) iti operasion ti HADR para kadagiti biktima ti Severe Tropical Storm "Kristine" iti Villamor Air Base iti Siudad ti Pasay idi Nobiembre 2, 2024. (Ladawan: PAF)
“Saan laeng a nangipaay ti madagdagus ken epektibo a suportada iti kasapulan a tulong no di ket pinatibkerna pay ti singgaluttayo bayat ti panagtitinnulongtayo a nangparmek iti daytoy a trahedia,” kinuna ni OCD Administrator, Undersecretary Ariel Nepomuceno.
Malaksid kadagiti tallo a pagilian, nangipatulod pay ti Indonesia iti An Mil Mi-17 cargo aircraft ken Airbus H-225M multipurpose aircraft manipud iti Indonesian National Armed Forces idi Okt. 31 tapno tumulong iti HADR operations ti PAF.
Agtalinaed pay laeng ti Indonesian team iti pagilian bayat nga agtultuloy dagiti relief missions.
Nasurok a 8.5 a milion a tattao ti dinidigra da Kristine ken Leon iti entero a pagilian, a kadagitoy, 809,00 ti naibakuit iti 1,351 nga evacuation center.
Naireport a met a 150 a tao ti natay ken 20 ti di pay nasarakan gapu kadagitoy dua a bagyo.
Agingga ita nga aldaw, Nobiembre 3, Domingo, napattapatta met a P12.81-bilion ti pategna nga impraestruktura ken apit ti nadadael.
Agdagup iti 241 a lugar ti naideklarar nga adda iti state of calamity gapu kada Kristine ken Leon. (Martin Sadongdong/Manila Bulletin)
