Nanayonan manen ni June Mar Fajardo dagiti naruayen a gunggonana kalpasan ti pannakabigbigna kas Best Player of the Conference iti PBA Season 49 Governors’ Cup iti daytoy a Domingo, Nobiembre 3. Ni met Rondae Hollis-Jefferson ti nabigbig manen a Best Import.
Addaanen iti walo a Most Valuable Player award, nagun-od ni Fajardo ti maika-11 a Best Player of the Conference award-na iti laksid a saan a nakagteng ti San Miguel Beer a team-na iti finals, idinto a napagtalinaed met ni Hollis-Jefferson ti Best Import award nga immuna nga inatiwna iti Season 47--ti kaudian a pannakairusat ti nadakamat a cup.
Kasano a labanan ti cyberthreat kadagiti pirate site?
Naipaay ti pammadayaw kadagiti dua sakbay ti Game 4 ti Finals series iti nagbaetan ti TNT Katropa ken Barangay Ginebra San Miguel Kings.
Kas iti napalpalabas, intartarayan manen ni Fajardo dagiti kabalubalna babaen ti 989 a puntos--a kombinasion ti statistical points ken dagiti botos dagiti kameng ti prensa ken dagiti player a mismo.
Ti kaasitgan a kabalubalna a ni Japeth Aguilar (ti Ginebra), nakagun-od laeng iti 664 a puntos, a sinaruno met ni Scottie Thompson (ti Ginebra met laeng) nga addaan iti 465 a puntos. Da Arvin Tolentino (ti NorthPort), Robert Bolick (ti NLEX) ken CJ Perez (ti SMB) dagiti dadduma pay a BPC finalist.
Kabayatanna, nupay maibilang a nagsalisalan laengen da Hollis-Jefferson ken Justin Brownlee ti Best Import, adayo ti timartarayan daytoy import ti TNT Katropa nga addaan iti 1,221 a puntos.
Maikadua ni Brownlee (ti Ginebra) nga addaan iti 947 a puntos idinto a da Aaron Fuller ken EJ Anosike ti maikatlo ken maikapat babaen ti 590 ken 548 a puntos a nagun-odda, kas panagsaganadda. (Reynald I. Magallon/MB/AST/Bannawag)
