Inretiro ti Toronto Raptors ti No. 15 a jersey ni Vince Carter bayat ti seremonia iti halftime ti ay-ayam ti Raptors kontra kadagiti Sacramento Kings. Daytoy ti kaunaan a numero nga inretiro ti nasao nga NBA Team.
Kuna ni Carter kadagiti fans a saan laeng a ti Carter 15 ti naitan-ok iti ngato no di pay ket isuda amin—kayatna a sawen, agraman dagiti fans.
Kasano a labanan ti cyberthreat kadagiti pirate site?
Dagiti nakadua ni Carter iti Toronto a kas kada Tracy McGrady, Antonio Davis, Kevin Willis, Charles Oakley, Morris Peterson, Dee Brown, Jerome Williams, Alvin Williams ken Muggsy Bogues agraman dagiti kameng ti pamiliana, ken ni Raptors president Masai Ujiri, binayabayda ni Carter bayat ti seremonia.
Iti panangyam-ammo ni Ujiri ken ni Carter, kinunana a sinursuruan ida ni Carter a tumayab. Inayonan daytoy dagiti timmabuno babaen ti dir-i ken sipsipat.
Ti kakaisuna a player iti pakasaritaan ti NBA a nagay-ayam iti uppat a nagduduma a dekada, wenno 22 a tawen, nagay-ayam ni Carter iti nasurok nga innem a season iti Toronto Raptors. Inyalatna ti 1999 Rookie of the Year ken nagbalin nga All-Star iti maikadua a season a nakakoronaanna met nga Slam Dunk champion; daytoy a season ti kaunaan a pannakastrek ti Toronto iti playoffs.
Nupay in-sweep ti Knicks iti kaunaan a postseason-na, iti sumaruno a tawen, nakastrek manen da Carter ken ti Raptors iti playoffs ket inatiwda ti New York Knicks iti Game 5 iti Madison Square Garden.
Para ken ni Carter, ti panangabakda iti serye kontra iti Knicks ti maysa kadagiti kaimnasan a lagip bayat ti kaaddana iti Toronto.
Mabigbig ni Carter a dakkel ti naaramidanna iti tay-ak ti panaglatak ti basketbol iti Canada, nagbalin nga inspirasion dagiti simmarsaruno nga NBA player a kas kada Tristan Thompson, sigud a guardia ti Raptors a ni Cory Joseph ken ti agdama a forward ti Raptors a ni Kelly Olynyk.
Maysa ni Thompson kadagiti sumagmamano a player, agraman da Stephen Curry ken dagiti sigud a player ti Raptors a da Kyle Lowry ken DeMar DeRozan, a nangipatulod iti pangablaawda ken ni Carter babaen ti video a naipabuya sakbay ti seremonia iti korte.
“Awanak ditoy no saan a gapu kenka,” kinuna ni Thompson.
Bayat ti panagay-ayamna iti Toronto, nabirngasan ni Carter iti “Air Canada” gapu kadagiti dakdakna babaen ti nangato a lagtona. Gapu kadagiti nagsasaruno nga injury ken yaababa ti produksionna, dinillaw dagiti fans ni Carter gapu ta kaykayatna lattan ti ag-jump shot imbes nga agsalaksak.
Nagretiro ni Carter idi 2020 iti edad a 43. Itay napan a bulan, naisaad iti Naismith Memorial Basketball Hall of Fame.
Sakbay ti seremonia, inlukaisda ti kumot ti mural ni Carter iti downtown Toronto. Itay Septiembre, linukat met ti Raptors ti biniagda manen a Vince Carter Court iti maysa a parke iti Toronto. (AST/Bannawag/Karaman ti sumagmamano a datos manipud iti AP)
