WASHINGTON, D.C. — Ita pay laeng, agur-uray ti sangalubongan iti resulta ti nainget a laban iti kinapresidente da Kamala Harris ken Donald Trump iti eleksion itoy nga aldaw, Martes, Nob. 5 (depende iti time zone, ngem ditoy Filipinas, mangrugi inton rabii iti daytoy nga aldaw, Nob. 5).
Kamala Harris ken Donald Trump
Napaiget ti seguridad iti kabesera itoy a siudad a yan dagiti nangangato nga alad ken naiserra pay laeng a negosio, idinto a rimsua dagiti nabara a patangan maipanggep iti politika iti adu a paset ti US.
Kamala Harris ken Donald Trump
Pope Francis, nakalasaten iti peggad gapu iti pneumonia ngem adda pay laeng iti ospital
Binusbos ni Harris ti maudi nga aldaw ti kampania iti entero a Pennsylvania a mabalin a pakaalaan iti 19 nga electoral votes, kadakkelan kadagiti amin nga estado ken manamnama a mangikeddeng iti resulta ti Electoral College. Iti sabali a bangir, impempennek met ni Trump ti nagkampania, iti maudi a gundaway, kadagiti estado ti Pennsylvania ken North Carolina a maibilang a kabaraan a paglabananda ken Harris.
Naorganisar met dagiti grupo a mangbantay iti eleksion iti entero nga estado ken idiay Virginia, kunam la no agbuya dagiti Amerikano iti Super Bowl ti panangbantayda iti eleksion.
Sakbayna, adda nasurok a 77-milion nga Amerikano a nakipaset iti nasapa a panagbotos iti personal man wenno panagbotos babaen ti koreo.
Umuna iti pakasaritaan ti US
Gapu kadagiti adu ken makapariribuk pay ketdi a patangan maipanggep iti eleksion kadagiti napalabas a bulan, mabalin nga adda dagiti saan a nain-intonaran a historikal a kaipapanan daytoy nga eleksion.
No mangabak ni Harris, agbalinto a kaunaan a babai a presidente iti 248 a tawen a pakasaritaan ti Estados Unidos.
Isunto pay ti umuna a Nangisit a babai ken umuna a nagtaud iti puli a South Asian a mangtengngel iti opisina. Iti panagkampaniana, liniklikan a dinakamat ni Harris ti katatao ken puli amangan no mayadayo laeng isuna kadagiti mangsupsuportar kenkuana. Ngem sigurado la ketdi a saan a mabalin a di ikkan dagiti historiador ti kaipapanan ti panangabak ni Harris.
Sabali met a kita ti historikal a gapuanan ti ibagian ti panagballigi ni Trump.
Isu ti agbalinto nga umuna a tao a nakedngan a nagbasol iti felony a nabotosan a presidente ti U.S. ta nasentensiaan iti 34 a felony counts iti kaso a hush-money iti New York nasurok bassit a lima a bulanen ti napalabas.
Inrason ni Trump, a sisasango pay laeng iti felony charges iti di nakurkurang pay ngem dua a nagsina a kaso kriminal, nga isu ket biktima ti sistema ti hustisia a namarisan iti politika. Ket agparparang a pinullo a milion a botante ti mamati kenkuana — wenno di napateg kadakuada dagitoy maibagbaga a nakabasolanna.
Kaano a maammuan ti resulta?
Ti Aldaw ti Eleksion iti Estados Unidos ket masansan itan a maibilang a Lawas ti Eleksion gapu ta sursuroten ti tunggal estado dagiti bukodda a pagannurotan ken aramid iti panagbilang kadagiti balota — saan pay a mairaman dita dagiti legal a karit — a mabalin a mangitantan kadagiti resulta. Ngem ti kinapudnona, itoy a gundaway, awan ti makaammo no kasano ti kabayagna sakbay a maipakaammo no asino ti nangabak.
Rinetrato ni Isabel de Leon
Agpada a mamati dagiti tattao nga adda iti likudan da Harris ken Trump: malaksid ngata no nagbiddutda iti panangipapan, nairut ti laban kadagitoy maibilang a “swing states”: Arizona, Georgia, Michigan, Nevada, North Carolina, Pennsylvania, ken Wisconsin. Kunada a dagitoy nga estado ti mabalin a mangikeddeng no asino ti sumaruno a presidente ti Amerika.
Nupay kasta, ti kinadakkel ti mapa ti US ken ti kinairut ti risiris ti mamagbalin a narigat a maipadto no kaano a mabalin a maideklarar ti nangabak. (ISABEL DE LEON/ Nairaman ditoy ti report ti Associated Press)
