Kinompirmar ti Department of Social Welfare and Development (DSWD) idi Lunes, Nobiembre 4, ti mapan a 400,000 a pamilia nga adda iti wait list a kas maikari para iti Pantawid Pamilyang Pilipino Program (4Ps) ken manglitup kadagiti mabakante dagiti pamilia a rummuaren kas benepisiario iti programa.
Inlawlawag ni DSWD Director Gemma Gabuya, 4Ps National Program Manager, nga idi Hulio 2023, imbilin ni DSWD Secretary Rex Gatchalian ti reassessment dagiti benepisiario ti 4Ps a dati a naklase a kas “non-poor” iti babaen ti “Listahanan 3.”
Nagbanag ti reassessment iti pannakaisubli ti agarup 700,000 a benepisiario.
Kinuna ni Gabuya a maitunos ti proseso ti iruruar iti programa kadagiti probision ti Republic Act No. 11310 wenno 4Ps Law, a mangibilbilin a rummuar ti maysa a benepisiario iti programa no agtawenen iti 19 ti maudi a na-monitor nga ubing iti pamilia.
Kiddaw ni Quiboloy a Medical Furlough, inanamongan ti Pasig RTC
Tapno agbalin a kualipikado iti programa, masapul a situtulok dagiti pamilia a mangtungpal kadagiti kondision ken addaan kadagiti kameng ti pamilia nga agtawen iti 18 ken nababbaba, wenno masikog iti tiempo ti panagrehistro.
Apaman a ma-validate ken makompirmar a kualipikado, dagitoy a pamilia ti mangsukat kadagiti benepisiario a rimmuaren iti programa.
Makaawat ti tunggal pamilia a benepisiario iti PhP750 iti binulan para iti salun-at; PhP300 iti kada ubing iti elementaria, PhP500 iti kada ubing iti junior high school, ken PhP700 iti kada ubing iti senior high school, nga addaan limitasion a tallo nga ubbing laeng iti kada pamilia, iti las-ud ti 10 a bulan iti kada school year; maipaay ti binulan a subsidy ti bagas a PhP600.
Iti agdama, nasurok nga uppat a milion a pamilia iti entero a pagilian ti rehistrado a benepisiario ti 4Ps. (Ellalyn De Vera-Ruiz/MB //Roy V. Aragon/Bannawag)
