Impakaammo ti Department of Agriculture (DA) a ngimmato iti 10 agingga 15 a porsiento ti presio ti natnateng gapu iti panagkurang ti suplay kadagiti kangrunaan a paggapgapuan wenno pakaimulmulaan dagiti nateng nga inapektaran ni Bagyo Kristine.
Daytoy ti impalgak ti panakangiwat ti DA a ni Assistant Secretary Arnel De Mesa, iti maysa a press briefing itay Nobiembre 4.
Segun ken ni De Mesa, dinadael ti bagyo dagiti lugar a kangrunaan a pagmulaan iti nateng kas iti Cordillera (CAR), Region II, CALABARZON, ken Central Luzon, a nangkissay iti 28,000 a metrika tonelada iti suplay ti natnateng.
Kinuna ni De Mesa nga adda pay met ketdi sabali a pagalaan iti nateng a kas iti Visayas ken Mindanao, ken kadagiti paset ti Luzon a saan nga inapektaran ni Kristine.
'Ti Bassit a Prinsipe,' napadayawan a kapintasan a naipatarus a libro iti Ilokano iti Maika-42 a National Books Awards
Makitintinnulongen ti Agribusiness and Marketing Assistance Service (AMAS) ti DA kadagiti regional field office tapno maibiahe dagiti di naapektaran nga apit kadagiti rehion a naapektaran.
Impasigurado ni De Mesa a tumalingenngen ti presio dagiti nateng iti las-ud ti maysa wenno dua a lawas, no natalgeden ti suplay ti nateng. (Jel Santos/Manila Bulletin//Lito Hilidon/Bannawag)
