Agtalinaed a "natibker" ti relasion iti nagbaetan ti Filipinas ken US uray asino ti mangabak iti eleksion iti kinapresidente iti nagbaetan da dati a presidente Donald Trump ken Bise Presidente Kamala Harris.
Impatalged daytoy ni US Ambassador iti Manila MaryKay Carlson iti daytoy nga aldaw, Mierkoles, Nobiembre 6, bayat ti panangpadpadaan ti lubong, agraman ti Filipinas, iti resulta ti nainget a laban.
"Iti demokratiko a sistema ti gobierno ti US, ti Kongreso ti umuna a mapaturay no maipapan iti badiet kadagiti operasiontayo iti ballasiw-taaw, para kadagiti sibilian man wenno militar," kinuna ni Carlson iti maysa nga interbiu.
Ket gapu ta adda "kas kaadu dagiti Republikano dagiti Demokrata a mangsupsuportar iti aliansa ti US ken Filipinas,” kinuna ni Carlson a napintasto latta ti relasion dagitoy dua a pagilian iti masakbayan.
Pakaisukatan ti Doliar iti Pisos iti Nobiembre 25, 2024
"Walo a tawenen nga adda iti Estados Unidos ti counterpart-ko ken nasayaat a gayyemko [Philippine Ambassador iti US] Babe Romualdez. No kunana nga agtalek nga adda bipartisan support, dakkel ti panagtalekko ken ni Ambassador Romualdez. Ket kasta met ti sentimientok," innayonna.
Ngem kinunana a saan nga agpatingga ti eleksion ken ti demokratiko a proseso iti aldaw ti eleksion.
"Kas iti kinuna ni dramaturgo Tom Stoppard, ‘Ti panagbotos, saan nga isu ti demokrasia; adda iti panagbilang,’” kinuna ni Carlson. (Joseph Pedrajas/Manila Bulletin)
