Nayiskediul ti 'Aldaw ti Panagbasa' (National Reading Day) ita a tawen iti Nobiembre 27, segun iti Department of Education (DepEd).
Maisaysayangkat kadagiti eskuela publiko iti entero a pagilian, agpaay ti 'Aldaw ti Panagbasa' a kas pangleppas nga aktibidad para iti National Reading Month (NRM) a paset ti panangiwayat ti DepEd iti kultura ti panagbasa tapno mapasayaat ti literacy skills dagiti agtutubo a Filipino.
Naibasar ti nasao nga iskediul iti DepEd Order No. 09, series of 2024, wenno ti Implementing Guidelines on the School Calendar and Activities for School Year (SY) 2024-2025.
Kabayatan ti NRM, ibilbilin ti DepEd kadagiti eskuela ken learning centers ti pannakayimplementar dagiti programa a “Five Words a Week (FWAW) / A Paragraph a Day (APAD) / Library Hour a Week.” Panggep dagitoy a programa a masursuruan dagiti agad-adal a mang-master iti maysa a balikas iti inaldaw iti lima nga aldaw kada lawas ken ti mangibasa iti napigsa iti maysa wenno dua a parapo iti inaldaw sakbay a mangrugi ti panagklase, tapno makatulong a mapadur-as iti communication skills dagiti ubbing.
Kiddaw ni Quiboloy a Medical Furlough, inanamongan ti Pasig RTC
Mainayon met a maidiaya dagiti programa para iti remedial reading a pangipaayan dagiti titser wenno class advisers kadagiti leksion kadagiti estudiante nga adda iti frustration reading level.
Mabalin pay a mangisayangkat dagiti eskuela ken learning centers kadagiti aktibidad a kas iti “Big Brother / Big Sister / Kaklase Ko, Sagot Ko / Shared Reading,” a pangisuruan dagiti natataeng nga estudiante wenno independent readers kadagiti estudiante nga adda iti struggling reading level.
Sabali pay nga aktibidad, ti "Drop Everything and Read" (DEAR), ti maar-aramid iti 15 agingga iti 20 a minutos iti inaldaw, a mausar a pagbasaan dagiti reading books wenno dadduma pay a reading materials nga adda iti eskuela. (Merlina Hernando-Malipot/Manila Bulletin //Roy V. Aragon/Bannawag)
