Adda itan iti West Philippine Sea (WPS) ni Bagyo a Marce (internasional a nagan: Yinxing) a nangyeg iti pannakadadael iti amianan a Luzon, segun iti Philippine Atmospheric, Geophysical and Astronomical Services Administration (PAGASA) ita a Biernes, Nobiembre 8.
Itay 7:00 ti agsapa, nasaripatpatan ti sentro ti bagyo iti 100 a kilometro iti laud-amianan a laud ti Siudad ti Laoag, Ilocos Norte.
Kimmapuy ni Bagyo a Marce ket addaan laengen iti kapigsa a 150 a kilometro tunggal oras iti asideg ti sentrona, ken dumanon iti 205 a kilometro tunggal oras a werretna.
Nagtalinaed iti Signal No. 3 iti Ilocos Norte, amianan a laud ti kadaklan a Cagayan, ken amianan a paset ti Ilocos Sur.
Dikay mangmangted iti limos, indagadag ti DWSD
Signal No. 2 latta iti laud a paset ti Babuyan Islands, amianan ken laud a paset ti kadaklan a Cagayan, dadduma a paset ti Apayao, dadduma a paset ti Abra, amianan ken laud a paset ti Kalinga, ken iti sentro a paset ti Ilocos Sur.
Iti sabali a bangir, adda latta iti Signal No. 1 ti Batanes, dadduma a paset ti Babuyan Islands, dadduma a paset ti kadaklan a Cagayan, ti amianan ken laud a paset ti Isabela, amianan ken laud a paset ti Nueva Vizcaya, amianan a laud ti Quirino, ti dadduma a paset ti Kalinga, Mountain Province, Ifugao, Benguet, ti dadduma a paset ti Ilocos Sur, La Union, ken ti amianan ken sentro ti Pangasinan.
Manamnama a rummuar ni Bagyo Marce iti Filipinas itoy a malem wenno rabii. (Ellalyn De Vera-Ruiz/Manila Bulletin//Lito Hilidon/Bannawag)
