Naibaon ni Bronny James iti South Bay Lakers, ti team ti Los Angeles Lakers iti G League, amano iti panglukat nga ay-ayam ti nasao a liga.
Daytoy ti impakammo ti Lakers iti daytoy Biernes, Nobiembre 8 (oras iti Filipinas), para iti 20-anios nga anak ni LeBron James.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Nakastreken ni Bronny iti tallo nga ay-ayam para iti Lakers, a nakagun-odanna iti uppat a puntos iti 13 a nagtitipon a minuto. Idi Oktubre 22, nairekord da LeBron ken Bronny iti pakasaritaan ti National Basketball Association ti kaunaan nga asmang ti agama a nagay-ayam kas agkadua iti maysa a team iti panglukat nga ay-ayam ti Lakers kontra iti Minnesota Timberwolves.
Nagun-od met ni Bronny ti kaunaan nga iskorna iti NBA para iti Lakers iti Cleveland idi Oktubre 31 (oras iti Filipinas), iti arena a nangbuybuyaanna iti amana bayat ti kinaubingna.
Naipakpakaunan ti Lakers ken ni LeBron mismo nga adda dagiti tiempo a mapan agay-ayam ni Bronny iti G League bayat ti panagdebelop daytoy.
Nalasat ni Bronny ti atake iti puso idi 2023, simrek iti sumagmamano nga ay-ayam bayat ti maysa a season-na iti college basketball iti Southern California sakbay nga indeklarana a makiraman iti napalabas a draft iti NBA. Pinili met ti Los Angeles iti maikadua a rikus ti draft.
Kadagiti home games ti South Bay Lakers, maangay daytoy iti training complex ti Lakers iti El Segundo, California. Sangailienda a kaay-ayam ti Salt Lake City Stars inton Domingo, Nobiembre 10, 2024 (oras iti Filipinas). (AST/Bannawag/Karaman ti report manipud AP)
