Immiskor ni Donovan Mitchell iti 29 a puntos para iti Cleveland Cavaliers a nangatiw iti 131-122 kontra iti New Orleans Pelicans iti National Basketball Association iti Huebes, Nobiembre 7, 2024 (oras iti Filipinas).
Babaen daytoy a panangabak ti Cavaliers, nagun-odna ti rekord a kapintasan a panglukat iti NBA season iti pakasaritaan ti prangkisa.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Indauluan ni Mitchell ti balanse nga atake dagiti Cavaliers. Nangibinglay da Jarrett Allen iti 16 a puntos ken 14 a rebound, Caris LeVert iti 16 a puntos, Evan Mobley iti 15 a puntos, Darius Garland iti 14 a puntos ken Ty Jerome iti 11 a puntos.
Babaen ti kartada a 9-0, ti Cavaliers ti numero uno ita a team iti NBA a buklen ti 30 a team.
Ti Golden State Warriors nga addaan iti kartada a 7-1 (ken makitabla a numero uno iti Western Conference) ti sumaruno a kasango ti Cavaliers inton Sabado (oras iti Filipinas). (AST/Bannawag)
