Inwaragawag ti Department of Health (DOH) idi Huebes, Nob. 7, ti panagbaba dagiti kaso ti dengue iti entero a pagilian.
Segun iti DOH, nakitada ti 8% nga ibababa dagiti na-dengue manipud Septiembre 29 agingga iti Oktubre 12, 2024 wenno aganay a 21,097 a naireport a kaso kas maikomparar iti 23,032 a kaso a naireport manipud Septiembre 15 agingga 28, 2024.
Kinuna pay ti DOH nga “amin a rehion iti pagilian, saan a nakairehistro iti ingangato ti kaso iti daytoy a panawen, malaksid iti National Capital Region (manipud 2,765 a kaso, ngimmato iti 3,002 a kaso), Central Luzon (manipud 2,219 a kaso, ngimmato iti 2,351), and CALABARZON (manipud 2,907 a kaso, ngimmato iti 3,513)."
Segun pay iti datos ti DOH, tunggal sangagasut a Filipino a na-dengue, bimmaba met ti bilang dagiti pimmusay itoy a tawen no ikomparar iti napalabas a tawen.
Kiddaw ni Quiboloy a Medical Furlough, inanamongan ti Pasig RTC
"Manipud Oktubre 26, 2024, nababbaba a Case Fatality Rate (CFR) a 0.26% ti naireport, no maikomparar iti CFR a 0.34% idi napan a tawen iti isu met laeng a panawen ti panangmonitor," kinuna pay ti DOH.
Impaganetget met ti DOH a makitintinnulong kadagiti local government units (LGU) para iti panangliklik ken pannakaiwayat dagiti inisiatibo kontra iti dengue a pakairamanan ti pannakaisigurado a madadael dagiti pagit-itlogan dagiti lamok, panangipalagip kadagiti tattao nga agsuotda iti makaabbong iti ad-adu a parte ti kudil ken agusar kadagiti mosquito repellent lotion wenno spray, ken panangsigurado a masapa a maammuan no nakapet ti dengue tapno madagdagus a maikonsultar iti doktor wenno maipan iti health center. (Merlina Hernando-Malipot/Manila Bulettin)
