Nagbalinen a linteg ti Philippine Maritime Zones Act ken ti Philippine Archipelagic Sea Lanes Act -- dua a linteg a mangsalaknib iti karbengan ti Filipinas iti sakupna a kadanuman, kalpasan a pirmaan ni Presidente Ferdinand Marcos Jr. dagitoy ita nga aldaw, Nobiembre 8.
Ideklarar ti Republic Act (RA) No. 12064, wenno ti Philippine Maritime Zones Act, ti karbengan ti Filipinas kas agwaywayas nga estado ken mangilawlawag iti kinasaknap ti karbenganna iti sakupna a taaw, kas iti internal waters, archipelagic waters, territorial sea, contiguous zones, exclusive economic zones (EEZ) ken ti continental shelf, kas maitunos iti United Nations Convention on the Law of the Sea (UNCLOS), agdama a linteg ken katulagan.
Iti sabali a bangir, ti RA No. 12065, wenno ti Philippine Archipelagic Sea Lanes Act ti mangsalaknib iti karbengan ti Filipinas ken iturayanna a taaw babaen ti pannakaituding dagiti ruta ken lugar a mabalin nga usaren wenno papanan dagiti ganggannaet a bapor militar ken ganggannaet a nairehistro nga eroplano a lumabas, kas maitunos iti UNCLOS ken iti Chicago Convention.
Ikeddeng ti Archipelagic Sea Lanes Act ti dua a ruta nga agpadaya-laud ken maysa nga agpaamianan-laud:
Dikay mangmangted iti limos, indagadag ti DWSD
* Sea Lane I: Philippine Sea-Balintang Channel-West Philippine Sea
* Sea Lane II: Celebes Sea-Sibutu Passage-Sulu Sea-Cuyo East Pass-Mindoro Strait-West Philippine Sea
*Sea Lane III: Celebes Sea-Basilan Strait-Sulu Sea-Nasubata Channel-Balabac Strait-West Philippine Sea
Patien ni PBBM a babaen ti dua a linteg, naan-anay ti kinatalged ken kinadur-as iti taaw nga iturayan ti Filipinas. (Argyll Cyrus Geducos/Manila Bulletin//Lito Hilidon/Bannawag)
