Kiniddaw ti Department of Social Welfare and Development (DSWD) iti Department of Budget and Management (DBM) a masukatan koma a dagus ti Quick Response Fund (QRF) ti ahensia tapno agtultuloy latta ti pannakaipaay iti tulong kadagiti maapektaran ti agsasaruno a bagyo a nangdidigra iti pagilian.
Kinuna ni panakangiwat ti DSWD ken Disaster Response Management Group (DRMG) Assistant Secretary Irene Dumlao a namnamaenda a masukatanen ti QRF inton sumaruno a lawas.
Kiddawen ti DSWD ti PhP875 a milion tapno masuportaran ti pannakaipaay ti tulong kadagiti pamilia nga inapektaran dagiti naglabas a bagyo, agraman da Kristine, Leon, ken Marce, ken ti ania man a mabalin nga umay didigra.
Kinuna ni Dumlao a kasapulan unay ti pondo ti QRF iti madama a panaggatangda kadagiti makan ken maipanamnama a maipaayda ti kasapulan a tulong dagiti komunidad nga inapektaran ti didigra. (Ellalyn De Vera-Ruiz/Manila Bulletin//Lito Hilidon?/Bannawag)
