Impakaammo ni daulo ti Armed Forces of the Philippines (AFP) Chief General Romeo Brawner Jr. ti dakkel a panagkissay dagiti puersa ti Communist Party of the Philippines-New People’s Army (CPP-NPA) ta nagbalin laengen a 1,111 ti bilang dagiti rebelde a makigubat manipud iti 2,200 itay napan a tawen, kasta met dagiti armasda a nagbalin laengen a 1,000.
Iti taripnong ti 6th National Task Force to End Local Communist Armed Conflict (NTF-ELCAC) Executive Committee a naangay iti Malakanyang itay Nobiembre 8 nga indauluan ni Presidente Ferdinand Marcos Jr. impakaammo ni Gen. Brawner a gapu iti kontra-insurhensia nga operasion ti gobierno, nakissayan dagiti nakapuyen a guerilla front manipud pito, nagbalin nga uppat.
Kinuna ni Brawner nga itantan dagiti dadduma a natda pay a rebelde ti panagsukoda tapno makaalada iti kuarta babaen ti 2025 elections, ta agsingirda iti “permits to campaign” wenno “permits to win” kadagiti kandidato.
Nupay naballigi ti AFP iti daytoy a gandatna, impakdaar ni Brawner ti mabalin a pannakasinga dagitoy manipud kadagiti natda pay a rebelde, nangruna kadagiti adayu a kampo ti AFP, a mabalin nga adda dagiti sagpaminsan nga iraraut dagiti rebelde. (Trixee Rosel/Manila Bulletin//Lito Hilidon/Bannawag)
