Naikkan ti National Amnesty Commission (NAC) iti karbengan a mangted iti safe conduct passes, kalpasan nga inaprobaran daytoy ni Presidente Ferdinand Marcos Jr. (PBBM) tapno matulongan dagiti aplikante iti amnestia ng addaan iti warrant of arrest, a makaala iti serbisio ti amnestia, kinuna ti maysa nga opisial.
Impakaammo ni Chairperson ti NAC Leah Tanodra-Armamento itay Nobiembre 8 a pinatgan ni PBBM ti kiddawda a mangipaay ti NAC iti safe conduct passes dagiti aplikante ti amnestia ta saan dagitoy a makaapan iti opisinada nga agipila.
Ti safe conduct pass ket manamnama a mangtulong kadagiti tao nga aglemlemmeng wenno adda iti nasulinek a lugar, a mangpalubos kadakuada nga umasideg kadagiti opisina ti NAC nga awan ti pagbutnganda a maarestar, ta kaaduan nga aplikante ket addaan iti warrant of arrest.
Nagyaman ni Armamento iti National Task Force to End Local Communist Armed Conflict (NTF-ELCAC) gapu iti panangidatagda kadagitoy a banag iti Presidente, a mangipaganetget iti panagtitinnulongda a magsuportar kadagiti tao nga agsapsapul iti amnestia, nangruna dagiti nairaman kadagiti rebelde a grupo. (Jel Santos/Manila Bulletin//Lito Hilidon/Bannawag)
