Impaulog ni Presidente Ferdinand Marcos Jr. ti Executive Order (EO) No. 74, a pormal a mangiparparit iti Philippine Offshore Gaming Operations (POGOs), internet gaming, ken dadduma pay nga offshore gaming operations iti Filipinas.
Babaen ti EO No. 74 a pinirmaan ni Executive Secretary Lucas Bersamin idi Nobiembre 5, ipaganetget ti administrasion ni PBBM ti determinasionna a mangitandudo iti seguridad ti pagilian, ken iti kinatalged ken kinaurnos ti publiko. Immunan nga inyebkas ni PBBM ti pannakaiparit ti POGO iti maikatlo a State of the Nation Address idi Hulio daytoy a tawen.
Mairaman iti EO ti POGO, IGL, ken dadduma pay nga operasion ken serbisio ti offshore gaming a direkta a maidiaya kadagiti ganggannaet nga agay-ayam iti ruar ti Filipinas babaen ti internet, kas iti live stream a casino (e-casino), online a random number generator (RNG) game, ken pustaan iti online nga sports.
Saan a mairaman iti EO dagiti online a sugal nga iwaywayat dagiti casino a patpatarayen ti Philippine Amusement Gaming Corp. (Pagcor), lisensiado a pagsusugalan, wenno integrated a resort nga addaan iti junket agreements.
Kiddaw ni Quiboloy a Medical Furlough, inanamongan ti Pasig RTC
Dinakamat ni PBBM ti sukisok ti Department of Finance (DOF) nga agkunkuna a dakdakkel ti mapukaw kadagiti aktibidad ti POGO ngem kadagiti ekonomiko ken pagimbagan ti gimong nga ipaay ti POGO gapu kadagiti peggad ken dakes a pagbanaganna a kas iti panagadu ti krimen, di natalged a gimong, ken pananggundaway kadagiti tao a maigamer kadagitoy.
Kinuna pay ti report ti Anti-Money Laundering Council (AMLC) a mabalin a maaramat dagiti POGO kadagiti ilegal nga ar-aramid kas iti money laundering, panangallilaw, ken dadduma pay nga ilegal a pinansial nga aktibidad, ket mangpataud iti dakkel a pangta iti integridad ti nailian a pinansial a sistema. (Argyll Cyrus Geducos/Manila Bulletin//Lito Hilidon/Bannawag)
