MELBOURNE, Australia (AP)—Nagkaykaysa dagiti estado ken teritorio ti Australia idi Biernes a nangsuportar iti plano ti gobierno nasional a mangpilit iti kaaduan a porma ti social media a mangparit kadagiti ubbing a nababbaba ngem 16 ti tawenna.
Nangangay dagiti lider ti walo a probinsia iti virtual meeting ken ni Prime Minister Anthony Albanese tapno pagsasaritaanda ti addang, a kunana nga umuna iti entero a lubong, a mamagbalin kadagiti platform a pakairamanan ti X, TikTok, Instagram ken Facebook a responsable iti pannakaipatungpal ti age limit.
"Mangipapaay ti social media iti social harm kadagiti agtutubotayo nga Australiano," kinuna ni Albanese kadagiti reporter. "Masapul a maipangpangruna ti kinatalged ken salun-at ti panunot dagiti agtutubotayo."
Adun a bulan a pagsasaritaan dagiti lider ti gobierno ti ikeddengda a limit a tawen ket ikonkonsiderarda ti 14 agingga iti 16.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Nupay kaykayat koma ti Tasmania ti 14, nakasagana ti estado a mangsuportar iti 16 tapno agpapada iti sibubukel a pagilian, kinuna ni Albanese.
Maidatag daytoy a gakat iti Parliamento iti uneg ti dua a lawas, ket maaddan iti bileg makatawen kalpasan a maipasa a linteg tapno maikkan dagiti maseknan a platform iti panawen a mangtrabaho no kasano a mapengdanda ti panagusar dagiti ubbing. Awan pay ti teknikal a solusion nga insingasing ti gobierno.
Nairanta pay daytoy a pannakaitantan tapno maipaayan dagiti maseknan iti panawen a mangtaming kadagiti pakaseknan iti privacy maipapan iti panag-verify iti edad.
Sinuportaran ti kangrunaan a partido ti oposision ti 16 a limit ti edad, a mangipasimudaag a maipasa iti Senado ti lehislasion.
Ngem nagbalin a kritikal ti Greens party, nga agkuna a lapdan daytoy a ban ti panagruar iti Australia dagiti ubbing a masanguanan nga environmental activist a kas ken ni Greta Thunberg ti Sweden.
Nasurok a 140 nga akademiko nga eksperto kadagiti tay-ak a mainaig iti teknolohia ken pagimbagan dagiti ubbing ti nagpirma iti silulukat a surat para ken ni Albanese idi napan a bulan a mangbusor iti daytoy a social media age limit ta "namudel unay a wagas tapno agbalin nga epektibo a pangtaming iti daytoy a risgo."
Kuna dagiti kritiko a kaaduan a tin-edier itan ti nalaing iti teknolohia ket kabaelanda a liklikan dagiti kakasta a linteg. Pagam-amkan ti dadduma a mangpataud daytoy a ban kadagiti panagsusupiat iti uneg ti pamilia ket mangparnuay kadagiti nalimed a parikut iti social media.
Kuna met ti Meta, nga akinkukua iti Facebook ken Instagram, a maysa a simple ken epektibo a solusion ti panangusar dagiti nagannak kadagiti napipigsa a tools kadagiti apps store ken operating system a mangkontrol no ania dagiti apps a mabalin nga usaren dagiti annakda.
Yarig ti gobierno ti naisingasing a social media age limit kadagiti linteg a manglimitar iti panaglako iti arak kadagiti agtawen iti 18 iti entero nga Australia. Maipamuspusan latta dagiti ubbing ti uminum, ngem agtalinaed daytoy a pannakaiparit.
