SIUDAD TI TUGUEGARAO, Cagayan – Agarup 50,000 nga umili iti Cagayan Valley ti naapektaran iti bagyo ‘’Marce,’’ kas kinuna ti Department of Social Welfare and Development (DSWD)-Region 2.
Kinuna ni Mylene Attaban ti DSWD-Region 2 Disaster Response Management Division a 15,915 a pamilia wenno 48,822 nga indibidual ti naibakuit manipud iti 360 a barangay iti tallo a probinsia ti rehion.
Walopulo ket pito a porsiento ti agnanaed kadagiti evacuation center; dagiti dadduma, napanda met immapon kadagiti kakabagianda.
Ti Cagayan ti kaaduan iti naapektaran a pamilia, mapan a 15,518 wenno 47,629 nga indibidual; iti Isabela, 371 a pamilia wenno 1,112 nga indibidual; ken iti Batanes, 27 a pamilia wenno 81 nga indibidual.
Kiddaw ni Quiboloy a Medical Furlough, inanamongan ti Pasig RTC
Kinuna ni Attaban nga agtultuloy ti nainget a panangmonitorda iti epekto ti bagyo kadagiti ili ti Santa Ana, Alacapan, Lal-lo, Lasam, Pamplona, ken Santa Praxedes iti Cagayan.
Kinunana a nakaiwaras ti DSWD iti P2-milion a humanitarian assistance kadagiti apektado nga umili.
Iti sabali a bangir, inwaras ni Ilocos Norte Gov. Matthew Marcos Manotoc ti P55.8-milion a balor ti tulong manipud iti gobierno probinsial ti Ilocos Norte iti 16,789 a mannalon a nakaro a naapektaran iti bagyo a “Julian” idi Oktubre.
Nakaawat dagitoy a mannalon kadagiti mestiso a bukel ti mais, nadumaduma a bukel ti nateng, bin-i nga irik, ken abono, a manamnama a makatulong kadakuada a bumangon kalpasan a nadadael dagiti apitda gapu iti bagyo.
Dinidigra ni Julian ti nasurok a 195,000 nga indibidual iti Ilocos Norte, ken nakapukawanda iti mapan a P1.1-bilion ti pategna nga apit ken dadduma pay a sanikua, segun iti report ti Provincial Resiliency Council a napetsaan iti Okt. 7, 2024.
Impasingked ni Manotoc ti panagkumit ti gobierno probinsial a mangsuportar kadagiti mannalon. Nagyaman met dagiti mannalon ken ni Manotoc iti tulong ti gobierno probinsial. (Freddie Lazaro/Manila Bulletin)
