Iti umuna nga aldaw ti panagtakem ni Donald Trump a kas baro a presidente ti Estados Unidos, maysa kadagiti mapapati nga umuna nga asikasuen ti adminsitrasionna ti inkarina a panamagtalaw kadagiti ilegal a migrante iti US.
Kas imbagana iti rally-na iti Madison Square Garden, New York idi Septiembre: “Iti Day 1, isayangkatko ti kadakkelan a programa ti panagideportar iti pakasaritaan ti Amerika tapno mapagtalaw dagiti kriminal. Isalakanko ti tunggal siudad ken ili a naraut ken nasakup, ket ikursongtayo dagitoy a nadangkes ken mawaw iti dara a kriminal iti pagbaludan, kalpasanna, papanawentayo ida iti pagiliantayo iti kabiitan a panawen.”
Mabalin nga iturong ni Trump ti administrasionna a mangrugi a dagus a mangasikaso kadagiti migrante apaman a makatugaw iti White House, ngem nupay kasta, komplikado unay ti aktual a panangideportar iti mapan a 11 a milion a tattao a mapapati nga ilegal nga agnanaed iti Estados Unidos. Kasapulan daytoy ti adu a nasanay a puersa a mangipatungpal iti linteg, dadakkel a pasilidad a pagibaludan, adu nga eroplano a pagyakar iti tattao, ken dagiti nasion a mayat a mangawat kadagitoy (tattao a maideportar).
Kinuna ni Trump nga ipakatna ti Alien Enemies Act, ti manmano a maaramat a linteg a naparnuay pay la idi 1798 a mangipalubos iti presidente a mangideportar iti asino man a saan nga American citizen.
Kari ni Trump a panangikkat iti birthright citizenship: Maaramidna kadi a talaga?
Dinakamat ni Trump ti pannaka-deploy ti National Guard tapno maipatungpal dagiti panggepna. Mabalin a ma-activate ti National Guard babaen ti panangbilin ti maysa a gobernador ti estado. Kinuna ni Stephen Miller, maysa a top adviser ni Trump, a mabalin dagiti kakaduada a gobernador a Republikano ti mangibaon kadagiti tropa ti National Guard kadagiti kaarrubada nga estado nga agkedked a makipartisipar iti panangkemmeg kadagiti mapapati nga ilegal a migrante. (ASSOCIATED PRESS/MB)
