Nagbalinen a bagyo ni Ofel (addaan iti internasional a nagan nga Usagi) ket addaan daytoy iti kapigsa a 120 a kilometro tunggal oras nga angin iti matana ken pugso nga agingga iti 150 a kilometro tunggal oras, segun iti Philippine Atmospheric, Geophysical and Astronomical Services Administration (PAGASA).
Itay 4:00 ti parbangon, Nobiembre 13, nasaripatpatan ti bagyo iti 475 a kilometro iti daya nga amianan a daya ti Virac, Catanduanes wenno 595 km iti daya ti Daet, Camarines Norte.
Naibayog ti Tropical Cyclone Wind Signal No. 1 iti Cagayan (agraman Babuyan Islands), ti amianan ken sentro ti Isabela (Maconacon, San Pablo, Cabagan, Santa Maria, Divilacan, Palanan, Santo Tomas, Alicia, San Mateo, Aurora, Quezon, San Mariano, Naguilian, Dinapigue, Roxas, San Guillermo, Luna, Delfin Albano, City of Cauayan, Ilagan City, Angadanan, Benito Soliven, Tumauini, Reina Mercedes, San Manuel, Cabatuan, Quirino, Gamu, Mallig, Burgos), Apayao, ti daya a paset ti Kalinga (Rizal, Siudad ti Tabuk, Pinukpuk), ken ti daya a paset ti Ifugao (Alfonso Lista).
Segun iti PAGASA, posible a pumigsa pay ni Ofel iti sumaruno a 24 nga oras, ket mapattapatta nga agdisso iti daya a baybay ti Cagayan wenno Isabela inton Huebes (Nob. 14). (Ma. Cristina Arayata/PNA//Lito Hilidon/Bannawag)
