Impanawagan ni Senador Ramon “Bong” Revilla Jr. iti gobierno a saanna a baybay-an dagiti empleado ti Optical Media Board (OMB) nga agkarkarawa.
Bayat ti panangdengngeg ti Senado iti naisingasing a badiet ti OMB para iti 2025, nakuestionar ti kangrunaan a trabaho ti OMB kalpasan a nadakamat ni Senate President Pro Tempore Jinggoy Estrada ti posibilidad a mapukawen ti OMB.
Impalagip ni Estrada a ti pananglapped iti film piracy iti Filipinas ti kangrunaan mandato wenno aramid ti OMB, ngem iti idudur-as ti digital technology pinagbalinna nga awanen serbi ti kangrunaan a panggep ti ahensia.
“Awanen ti agpirpirata ita. Panagkunak, dayta ti kangrunaan nga aramidyo idi—ti mangtiliw kadagiti pirata ti pelikula ken mangipila iti kaso maibusor kadakuada. Ania ngarud ti pagrebbengan ken responsibilidad daytoy nga ahensia ita? Sapay koma ta saankayo a masasair ngem masapul a mapukawen ti OMB,” kinuna ni Estrada.
Gakat a mangipalubos nga agtrabaho dagiti Senior Citizen, inanamongan ti Kamara
Insingasing ni Estrada, a nangipila iti gakat maipapan iti pannakapukaw ti OMB, a mayakar dagiti 52 nga empleado ti ahensia iti Film Development Council of the Philippines (FDCP), Movie and Television Review and Classification Board (MTRCB) wenno iti dadduma pay nga ahensia ti gobierno nga adda pakainaiganna iti industria ti pelikula.
Naammuan dagiti senador nga awan ti agpirma kadagiti voucher para iti sueldo, benepisio ken dadduma pay a dokumento dagiti empleado ti OMB kalpasan ti panaglusulos ni OIC-CEO James Ronald Macasero a nangipila iti kandidaturana iti masungad nga eleksion.
Gapu iti daytoy, kinuna ni Revilla, maysa nga aktor a nagbalin a politiko, a mabalin a saan a masuelduan dagiti empleado ti OMB itoy a Disiembre, a masungad pay met ngarud ti Paskua.
Impeksa ni Revilla, a dati a chairman ti Videogram Regulatory Board a nagbalin nga OMB, ti pannakipagriknana kadagiti mangmangged a mabalin a mapukawan iti trabaho no maituloy ti pannakapukaw ti OMB.
Kas chairman ti Senate Committee on Civil Service, Government Reorganization and Professional Regulation, kinuna ni Revilla nga umanamong iti singasing a mayakar dagitoy nga empleado ti OMB iti sabali nga opisina.
"Narigat met ti kasasaad dagiti empleado ti OMB gapu iti pannakapukaw ti liderda a mangiturong kadakuada. Agbubutengda pay a mamimpinsan a mapukaw ti ahensiada,” kinuna ni Revilla.
“Ti laeng puntok, no talaga a mapasamak daytoy, saan koma a mabaybay-an dagiti empleado. Rumbeng a masursuruanda ken maikkanda iti training tapno mayakarda kadagiti dadduma nga ahensia ti gobierno,” innayon ti senador.
Indagadag met ni Sen. Mark Villar, a nangdepensa iti OMB, a suportaran dagiti kakaduana ti naisingasing a 2025 budget ti OMB iti plenary session. (Hannah L. Torregoza/MB)
