Inlawlawag ni Sekretario ti Department of Agriculture (DA) Francisco Tiu Laurel Jr. a napateg ti akem ti industria ti paltat iti panangpabileg iti kinatalged ti suplay ti taraon ken panagdur-as ti ekonomia, iti panagbitlana iti 1st National Catfish Dialogue nga inangay ti Bureau of Fisheries and Aquatic Resources (BFAR) manipud Nobiembre 4 agingga 6.
Iti pannakisaritana kadagiti kangrunaan a maseknan iti industria, impaganetget ni Laurel a napateg a paset ti panagtaraken iti paltat iti panagregget ti Filipinas a mangpataud iti taraon.
Segun iti BFAR, adda 2,792 a pagtaraknan iti paltat iti pagilian idi Disiembre 2023, nga addaan iti kalawa a 670 nga ektaria, ken nakapataud iti nasurok a 87 a milion nga an-annak ti paltat -- ket katukad ti 8 a porsiento a panagrang-ay sipud idi 2020.
Kinuna ni Officer-in-Charge ti BFAR Isidro M. Velayo Jr. a bassit laeng idi nangrugi ti industria ti paltat idi 2000, agingga a nagsaknap daytoy ket maysa itan a mangituggod iti sosio-ekonomiko a panagrang-ay dagiti agtartaraken iti lames iti entero a pagilian.
Kiddaw ni Quiboloy a Medical Furlough, inanamongan ti Pasig RTC
Ngem inaklon ni Velayo nga adda latta parikut a sangsanguen ti industria, kas iti kinabassit ti bilang dagiti breeder, kinaawan teknolohia, ken ti agbaliwbaliw a presio.
Insayangkat ti National Inland Fisheries and Technology Center ti BFAR, National Freshwater Technology Center, ken ti Inland Fisheries and Aquaculture Division ti taripnong dagiti eksperto, agtartaraken iti lames, managsukisok, ken kameng ti akademiko a grupo tapno adalenda ti agdama a kasasaad ti industria ken ammuenda ti pagturongan daytoy.
Nakipagmaymaysa dagiti nangato nga opisial, agraman ni Undersecretary for Fisheries ti DA Drusila Esther Bayate iti panangsuportarda iti panagdur-as ti industria ti paltat. (Jel Santos/Manila Bulletin//Lito Hilidon//Bannawag)
