Inlawlawag ti Philippine National Police (PNP) no apay a nakaruar iti Filipinas ni retirado a koronel ti polis ken dati a Philippine Charity Sweepstakes Office (PCSO) general manager Royima Garma ken ti balasang daytoy.
Kinuna ni PNP spokesperson Brig. Gen. Jean Fajardo, awan ti ania man a kaso a sangsanguen ni Garma iti pagilian isu nga awan ti makaiparit iti panagbaniaga daytoy iti abrod.
Segun iti datos ti PNP Directorate for Intelligence, kinompirmar ni Fajardo nga agpayso a nakapan ni Garma ken ti anakna iti Estdos Unidos ngem tinengngel ida dagiti autoridad ti imigrasion ti US.
Kabayatanna, panggep ti Department of Justice (DOJ) a pagbalinen a kas testigo ni Garma iti babaen ti Witness Protection Program (WPP) ti DOJ, ta segun iti House of Representatives Quad-Comm, "maysa a napateg a testigo" ni Garma. (MANILA BULLETIN)
