Inwaragawag ni kabbotos a presidente Donald Trump idi Martes, Nob. 12, nga idauluan da Tesla Motors CEO Elon Musk ken ti founder ti pharmaceutical company a Roivant Sciences a dati a nagpapili a Republican presidential nominee a ni Vivek Ramaswamy ti mabukel a “Department of Government Efficiency” a mangtulong iti administrasion ni Trump nangruna iti pannakaurnos ti pederal a gobierno.
Agpada a bilionario da Musk ken Ramaswamy a nasaet a mangsupsuportar ken ni Trump.
Kinuna ni Trump a saan a maysa nga ahensia ti gobierno ti Department of Government Efficiency no di ket agpaay a maysa a grupo iti ruar ti gobierno a mangbalakad iti White House tapno episiente a mapataray ti gobierno. Makikadua ti nasao a departamento iti Office of Management and Budget ti White House tapno “mangiturong iti large scale structural reform ken mangparnuay iti naisabsabali nga entrepreneurial approach iti gobierno.”
Saan pay laeng a nalawag no kasano ti panagtrabaho ti nasao a departamento wenno grupo. Mabalin a maipasidong daytoy iti Federal Advisory Committee Act, a mangipatpataray iti panagtignay dagiti grupo iti ruar a mangbalakad iti gobierno.
Pope Francis, nakalasaten iti peggad gapu iti pneumonia ngem adda pay laeng iti ospital
Iti kallabes, masansan nga ibagbaga ni Trump nga ikkanna ni Musk iti pormal nga akem a mangimaton iti grupo nga umasping iti blue-ribbon commission a mangirekomendar kadagiti wagas a mangkissay iti panaggasto ken mamagbalin a mas episiente ti pederal a gobierno.
Insingasing ni Musk, iti naminsan, a babaen iti panangilungalongna, mabalin a makainut ti gobierno iti $2 a trilion--dandani kakatlo ti dagup a tinawen a gastos ti gobierno. (Associated Press)
