Naibayog ti Tropical Cyclone Wind Signal (TCWS) No. 2 kadagiti dadduma a paset ti Cagayan ken Isabela bayat ti yaasideg ni Bagyo Ofel (internasional a nagan: Usagi) iti daya ti Luzon, segun iti Philippine Atmospheric, Geophysical and Astronomical Services Administration (PAGASA).
Itay 10:00 iti agsapa (Nob. 13) nasaripatpatan ti sentro ti bagyo iti 485 a kilometro iti daya-amianan a daya ti Daet, Camarines Norte. Nagtalinaed ti kapigsana a 120 a kilometro tunggal oras iti asideg ti sentrona, ken pugso a dumanon iti 150 a kilometro tunggal oras.
Itay 11:00 ti agsapa addan iti TCWS No. 2 iti daya a paset ti kadaklan a Cagayan (Baggao, Peñablanca, Gattaran, Gonzaga, Lal-Lo, Santa Ana) ken daya a paset ti Isabela (Maconacon, Divilacan, Palanan).
Naibayog ti TCWS No. 1 iti Batanes, Babuyan Islands, dadduma a paset ti kadaklan a Cagayan, dadduma a paset ti Isabela, Quirino, Nueva Vizcaya, Apayao, Kalinga, Abra, Mountain Province, daya a paset ti Aurora (Dilasag, Casiguran), Ilocos Norte, ken amianan a paset ti Ifugao (Alfonso Lista, Aguinaldo, Banaue, Mayoyao, Hingyon, Hungduan).
Kiddaw ni Quiboloy a Medical Furlough, inanamongan ti Pasig RTC
Agpalaud-amianan a laud ni Ofel iti Philippine Sea sakbay nga agdisso iti daya a taaw ti Cagayan wenno Isabela inton Huebes ti malem (Nob. 14).
Iti sabali a bangir, bambantayan ti PAGASA ti maysa pay a dawel ti panawen nga addaan iti internasional a nagan a “Man-yi,” ta posible a sumrek daytoy iti Philippine Area of Responsibility (PAR) ita a rabii (Nob. 13). Mapanaganan daytoy iti "Pepito" apaman a sumrek iti PAR.
Agpalaud-abagatan a laud iti kapardas a 30 a kilometro tunggal oras ket posible ti panagbalinna a maysa a bagyo inton Huebes.
Segun iti PAGASA, mabalin nga agdisso ti bagyo iti daya a taaw ti Luzon inton Sabado (Nob. 16) wenno Domingo (Nob. 17). (Ellalyn De Vera-Ruiz/Manila Bulletin//Lito Hilidon/Bannawag)
