Pinasingkedan ni dati a Presidente Rodrigo Duterte iti Kamara itay Mierkoles, Nobiembre 13, nga adda "reward system" kadagiti polis a nangpapatay kadagiti tao a nairaman iti droga, bayat ti war on drugs idi isuna ti presidente.
Gapu iti panangpalutpot kenkuana ni Diputado ti Kabataan Party-list Raoul Manuel iti bista ti Quad Committee (quad-comm) ti Kamara, inaklon ni Duterte nga adda naipaay a kuarta a kas gunggona kadagiti polis a nakipaset iti kampania kontra iti droga.
Sakbay daytoy, imbutaktak idin ni dati a general manager ti Philippine Charity Sweepstakes Office (PCSO) Royina Garma iti Quad-comm ti maipapan iti sistema a panggunggona a naitunos iti wagas ti "Davao Model," a pakairamanan ti makunkuna a Davao Death Squad.
Kinuna ni Garma a ni Duterte ti nangbilin ken ni dati a Commissioner ti National Police Commission (Napolcom) Edilberto Leonardo a mangipatungpal iti daytoy a wagas iti entero a pagilian tapno magunggonaan dagiti polis a mangpatay kadagiti suspek a nairaman iti droga, manipud PhP20,000 agingga PhP1 a milon.
Sinao ni BP Duterte a panangpapatay iti First Couple, ibilang ti Malakanyang a serioso a banag
Pinatalgedan ni Duterte a dagiti di nausar a pondo ti kampania ti nangpabileg kadagiti operasion kontra iti droga, ket inrasonna nga inaramidda daytoy tapno "masalkniban ti interes ti publiko."
Inaklon pay ni Duterte nga adda innem wenno pito a tao nga ibilangna a "kriminal" ti pinapatayna idi nagakem a kas Mayor ti Davao City.
Inaramid ni Duterte dagitoy a panangaklon iti sidong ti panagsapatana a kas resource person iti panagimbestigar ti Quad-comm. (Filane Mikee Cervantes/PNA//Lito Hilidon/Bannawag)
